Loluwari Média (Díli) – Komandante Departementu Investigasaun Kriminal Nasional (DIKN), Superintendente Polísia, João Belo dos Reis, hatete, Polísia Nasionál Timor-Leste (PNTL) koordena ho Autoridade Lokal no Igreja hodi regulariza komunidade sira atu labele halo Prezepiu besik Estrada Públiku iha Bairru, nune’e labele viola ema seluk nia direitu.
“Ita regularija prezepiu sira tantu iha estrada publiku no kada bairu sira nune’e labele viola ema seluk nia direitu. Tanba ema balu hakarak deskansa, balu ne’ebé moras no bebe oan sira.” Dehan Xefe DIKN, Superintendente polisia, João Belo dos Reis, ba jornalista sira, iha Komandu Jerál PNTL, Kaikoli, Dili, kinta (05/12).
Belo hatete, prezepiu sira ne’ebé halo iha dalan publiku no kada Bairru, tenke tu’ir lei nune’e labele perturba ordem públiku.
“Bainhira joven ou komunidade sira ulun to’os halo besik estrada mak ita detekta ida ne’e ita sei prosesu tu’ir lei.”
“Iha prezepiu sira ne’e la autoriza hemu tua toka muzika ne’ebé mak la relewante ba loron natal nian.” Belo agrumenta.
Superior ne’e mos husu ba inan- aman sira atu labele sosa fugetes ba oan sira hodi sunu fugetes no paison arbiru, bainhira deteka sei halo prosesu ba inan-aman.
Xefe Suku Kaikoli, Hipolito Sarmento, hatete, regularija prejepiu sira importante tebes hodi halo prevensaun ba violensia.
“Ita haree iha tinan kotuk akontese joven sira baku malu iha prezepiu tanba kauza husi konsumu alkohol nune’e agora daudaun tenke kontrola makaas nune’e labele hetan problema tan.”
Hipolito hatete, Polísia nu’udar autoridade seguransa presiza koordena ho autoridade lokal sira no parte igreja nune’e bele regulariza joven sira halo prezepiu do’ok husi Estrada publiku no labele okupa trotoar, no labele hemu tua, halo barullu iha prezepiu.
Autoridade lokal ne’e mos husu PNTL halo seguransa máximu iha selebrasaun loron natal tinan foun.
Jornalista : Chay Risky
Editór : Ilima’a