Loluwari Média (Díli) – Diretór Diresaun Investigasaun Kriminál Nasionál (DIKN), Superintendente Polísia, João Belo dos Reis, informa, Polísia Nasionál Timor-Leste (PNTL) liuhusi Servisu Sekreta Informasaun no Diresaun Investigasaun Kriminál Nasionál (DIKN) inklui Unidade Patrullamentu Fronteira (UPF) kaptura sidadaun na’in 3 inklui oknum membru PNTL ne’ebé hatama sasan kontra Bandu iha Fronteira Batugade.
“Ita nia operasaun kaptura sidadaun Timor oan na’in 3 inklui membru Polisia na’in ida ne’ebé importa sasan kontra bandu Bebidas Cocacola Kaixa 132 Sprite kaixa 126 no vitamina orange ho marka You C1000 dos 52 ne’ebé ita nia sidadaun sira importa husi fronteira Batugade, ita detein iha Sela DIKN nian.” Dehan, Diretór Diresaun Investigasaun Kriminál Nasionál (DIKN), Superintendente Polísia, João Belo dos Reis, ba jornalista sira, iha Kuartel Jerál PNTL Kaikoli, segunda (28/07).
João Belo, hatete, sidadaun ne’ebé importa sasan kontra bandu via fronteira rai maran, agora daudauk sasan iha Diresaun Investigasaun Kriminál Nasionál no sei aprezenta ba Ministeriu Públiku (MP) Maliana, tanba ne’e area juridiku munisípiu Bobonaro.
“Husi identifikasaun ne’e ita nia membru PNTL husi komandu munisipiu Ermera nian fasilita kareta ida ba tula sasan. Tanba sei iha Investigasaun nia laran tanba saida mak nia ba? No tanba saida mak nia tula? ida ne’e prosesu investigasaun sei lao hela.”
Komandu Jerál PNTL sei foti medidas, regulamentu disipliñar no krime nian la’o dala ida ba membru PNTL husi komandu munisipiu Ermera nian ne’ebé fasilita hodi tula sasan kontra bandu iha fronteira.
“Ita nia membru PNTL ne’e husi komandu munisipiu Ermera nian ho inisial ASG sidadaun sira seluk mak ALP no ITSR ne’ebé ita konsidera sira komete fraglante de litu tanba importa sasan kontra bandu husi nasaun viziñu mai iha territóriu nasionál liuhusi via terestre no ita nia suspeitu sira ita detein iha sela DIKN nian.”
Ho evidénsia sira agora daudauk DIKN asegura iha komandu no sei transporta ba Maliana inklui suspeitu sira hotu. Tanba iha area juridiku munisípiu Bobonaro.
Jornalista : Chay Risky