Loluwari Media (Dili) – Reitor Universidade da Paz (UNPAZ) Adolmando Soares Amaral, hatete, Prezidente Repúblika (PR), José Ramos-Horta, konkorda representante povu iha uma fukun parlamentu nasional atu sosa tan kareta prado foun ba deputadu hamutuk na’in 65.
Maske prezidente republika konkorda ho Parlamentu Nasionál (PN), atu sosa tan kareta prado foun atu apoiu sira nia knaar lejistativu durante mandatu, xefe estadu la konkorda atu deputadu sira halo viajen ba estranjeiru.
Daudauk ne’e deputadu sira iha parlamentu nasional kompostu husi bankada Kongressu Nasional Rekonstrusaun Timorense (CNRT), hamutuk na’in 31 deputadu, bankada Frente Revolusionariu Timor-Leste Independente (Fretilin), hamutuk na’in 19 deputadu, bankada Partidu demokratiku (PD) hamutuk na’in 6 deputadu, bankada partidu Kmanek Haburas Unidade Nasional Timor Oan (KHUNTO), hamutuk na’in 5 deputadu no bankada Partidu Libertasaun Popular (PLP), hamutuk na’in 4 deputadu.
“Prezidente konkorda, tanba nia fulan-fulan sai hela de’it se nia la konkorda deputadu sira, la autoriza nia viajen ba li’ur hanusa ne’ebé nia tenke konkorda depois fulan-fulan nia bele sai ba viajen”.
“Agora viajen sira ne’ebé Presidente Repúblika sai ne’e nia investor hira ona mak tama ona mai halo investimentu iha ne’e, ne’e mós kontribui ba gastus orsamentu jerál estadu hotu viajen sira ne’e, ne’ebé sira back up malu hela de’it, maibé sira ne’e hanesan de’it”, dehan Reitor Universidade da Paz (UNPAZ), Adolmando Soares Amaral, ba Jornalista sira iha resintu UNPAZ, tersa (02/09).
Akademista ne’e kritika, deputadu ka membru parlamentu nasional kinta lejislatura sai nu’udar referensia deputadu sira remata nia mandatu nafatin uza kareta prado. Tanba liu husi leilaun, tanba ne’e husi VI legislativu ezize atu sosa kareta prado foun ba deputadu na’in 65 ne’e hodi remata nia mandatu sira bele lelaun ba interese privadu.
“Referensia hatudu ona ba ita, primeiru prado sira uluk ne’e sira lelaun tiha tu’ir fali mai pajero sport mós sira lelaun tiha. Agora pajero sport mak seidauk lelaun, agora sira hola tan prado, ne’e pajero sport sira lelaun. Referensia hatudu hela ba ita ne’e sira nia argumentu polítiku de’it dehan patrimonio estadu nian. Mais no fim hotu tiha sira nia mandatu sira lori balu ho agora la entrega tan, imi haree deputadu sira legislatura kotuk ba ne’e uza hela prado sira to’o agora la entrega.”
Jornalista : Anis