Loluwari Média (Díli) – Tiru,,,Tiru,,,,Tau,,,,,Tau,,,,,! Gas Lagrimojeniu ne’ebé Polisia Nasionál Timor-Leste (PNTL) tiru sa’e nu’udar sinal ameasa ba manifestante sira. Ne’ebé balu konsege kanek no karreta rua vidru rahun.
Manifestante sira ne’e mai husi estudante UNTL, UNPAZ, UNITAL, UNDIL, IOB, Vendedór Taibesi, Ema ho defisiensia no sosiedade sivil ne’ebé mós la konkorda atu PN sosa karreta foun.
Observasaun loluwari.tl iha terenu, manifestante sira ida-idak mai ho prinsipiu ida de’it katak tenke kansela sosa karreta ba deputadu sira.
Maibé hafoin iha oras hirak nia laran, manifestante sira ho membru PNTL sira ne’ebé asegura seguransa komesa manas. no mosu “pihak ketiga” bee aqua komesa tuda hafoin Gas Lakrimojenu tarutu.
Husi asaun ne’e, raan fakar tanba manifestante sira balu kanek iha parte ulun, balu dada iis atu kotu, tanba horon Gas Lakrimojenu ne’ebé tiru.
“Ha’u sente triste bainhira ita nia Autoridade seguransa (PNTL), tiru ho gas Lakrímugenio ba ami manifestante sira, atu ami labele hato’o ami nia espresaun. Tanba ha’u mos nu’udar sidadaun timor oan ha’u hakarak ezize ha’u nia direitu ba PN”.
“Gas Lagrímojénio tiru ami, halo ha’u monu ho ha’u nia kondisaun Difiseinte ida hanesan ami nonok para ukun (na’in) sira hakarak sama ami nia dignidade tu’ir sira-nia hakarak.” Dehan Difiseinte Rui Quintão Ximenes, ba loluwari.tl iha Resintu UNTL hafoin partisipa Demostrasaun hasoru PN, Segunda (15/09).
Komunidade ema ho difisensia hamutuk ho Universidade iha Timor-Leste, inklui Sosiédade Sivil ezize ba Parlamentu Nasionál atu hapara sosa kareta.
“Ami nia kondisaun nune’e ohin estudante ho emosionalmente hodi tuda Parlamentu Nasional to’o ikus PNTL tiru gas Lagrímugenio mai ami, to’o ami balu monu no balu kanek.” dehan nia.
Nia dehan,isin mak difisensia maibé kakutak la Difiseinte no nu’udar timoroan iha direitu atu luta ba lia-loos. Tanba Parlamentu nasionál hanesan kultura ona kada tinan 5 sosa kareta Prado.
“Tempu ona para ami hamri’ik hodi defende ami nia rai maske ami ho kondisaun Defisiente, ami prontu hamutuk ho estudante universitariu sira hotu hodi hakilar ba PN atu hapara sosa kareta ho folin karun-karun de’it” dehan nia.
Iha fatin hanesan, Segundu Komandante Jerál Polísia Nasionál Timor-Leste (PNTL), Komisáriu Pedro Belo, husu ba manifestante sira hotu atu mantein disiplina hodi hato’o preokupasaun ba PN.
“Imi nia sentimentu ba Parlamentu Nasional labele ho emosaun no uza anarkizmu (labele) tuda fali Autoridade Seguransa (PNTL), tanba PNTL nia presiza atu asegura imi la’os atu kaptura imi” Belo hatete.
Hafoin ne’e, Koordenador Estudante Universitariu Timor-Leste (EUTL) Natalício Nunes konfirma, EUTL konsege halo dialogu ho Prezidente Parlamentu Nasional ne’ebé deside kansela prosesu sosa karreta ne’e.
“Ami representa estudante sira halo dialogu ho Prezidente Parlamentu Nasional atu bele deside desizaun sira tu’ir ezizensia EUTL, sira deklara imediata katak hapara prosesu ezekusaun sosa karreta 65” dehan nia.
Enkuanfu orsamentu Tinan 2025 ne’ebé PN aloka hodi sosa karreta hamutuk Millaun $4 resin.
Jornalista : Chay Risky