Loluwari Média (Díli) – Masa Manifestasaun loron daruak ne’ebé estudante sira mobiliza tantu sosiedade sivil, hodi ezize Parlamentu Nasionál, konsege situasaun manas uitoan atu hanesan iha Indonésia ho Nepal.
Tanba Iha loron primeiru karreta PNTL ho karreta diplomata vidru rahun inklui sasan seluk. No iha loron daruak karreta estadu ida hetan sunu iha kuartel jerál PNTL nia oin no estudante balu kanek husi gas lagrímugenio.
Portavos Komando Polísia Nasionál Timor-Leste (PNTL), Superintedente Polisia, João Belo, hatete, PNTL preokupa tanba asaun krime ne’ebé mosu afeita husi demostrasaun ne’ebé sasan balu estragus totál.
“Ita rejistu kazu karreta ida ohin hetan sunu, postu polisia tranzitu ne’ebé ita nia membru sira servisu ba mós hetan estragus no identifikadu membru ida kanek ohin hetan tuda fatuk, depois seluk tan sei iha prosesu identifikasaun.” Dehan nia ba jornalista sira, iha Kaikoli.
Tanba ne’e, Nia dehan, atu mantein asaun manifestasaun ne’e mak komandu bolu portavos EUTL hodi ko’alia hamutuk tenke iha koonkordansia ruma ba kontinuasaun kuarta ohin nian.
“Atu hato’o de’it katak, teknologia CCTV ho Drom grava buat hotu ne’ebé mak estudante sira halo, ne’ebé responsavel individuál kriminál ba sira ne’ebé mak halo sei responsabiliza ba iha ne’eba”dehan nia.
Iha fatin hanesan Reprezenta Portavos EUTL Natalicio Nunes Martins, hatete, dialogu EUTL ho segundu komandante Jerál atu diskute manifestasaun aban nian bele la’o ho diak no garante paz no estabilidade durante manifestasaun.
“Ita hotu hatene, desizaun husi ami nia ezijensia sira ne’e mak ami ezije kona-ba prado sira kansela ona liuhusi rezolusaun ida ne’e, no ezijensia segundu seidauk kansela kona-ba halakon lei Pensaun Vitalisia nian, ida ne’e seidauk, no mós halo alterasaun ba lei manifestasaun nian ne’ebé seidauk iha desizaun serteza ba estudante no ba povu tomak.” dehan nia.
Tanba ne’e ho ezijensia sira ne’e seidauk iha desizaun serteza, EUTL kolabora hodi halo dialogu ho PNTL, nune’e bele nafatin fo seguransa no asegura nafatin asaun manifestasaun ba oin hodi ezije ba PN.
“Atu fo hatene ba estudante sira atu garante nafatin paz no estabilidade. Ita nia asaun ba loron aban sei kontinua, ita husu parte PNTL atu bele asegura” dehan nia.
Tan ne’e aban kuarfa-feira (17/09) EUTL sei hasoru parlamentu Nasionál liuhusi reprezentante portavos inklui PNTL para atu bele hasoru deputadu sira.
Jornalista : Chay Risky