Loluwari Média (Díli) – Diretór Servisu Investigasaun Kriminál Nasionál (DSIKN), Superintendente Polísia, Joao Belo dos Reis, informa, Polísia Nasionál Timor-Leste (PNTL) liu-husi Diresaun Investigasaun Kriminál Nasionál rejista estudante nain 12 kanek inklui deskonfia sunu karreta mós liberta ona.
Nia dehan, estudante hirak ne’e oras ne’e balu sei hala’o hela tratamentu saúde iha HNGV.
“Horseik (tersa-feira) ita kaptura manifestante no ema balu ne’ebé infiltra tama iha laran hamutuk na’in 12, depois ita mós kaptura maluk ida ne’ebé sunu karreta Fortuner iha parte sorin ne’ebá. Ita lori mai halo identifikasaun hodi haruka nia fila.” Dehan Diretór Servisu Investigasaun Kriminál Nasionál (DSIKN), Superintendente Polísia Joao Belo dos Reis ba jornalista sira Komandu Jerál PNTL Kaikoli, kuarta (17/09).
João hatete, polísia halo ona identifikasaun ba manifestante ne’ebé sunu karreta ne’e ho nia naran no iha identifikasaun nia kontribui tebtebes.
“Hafoin idenfikasaun ita haruka nia fila tanba laos fraglante Delitu depois mak prosesu ne’e sei la’o”, nia relata.
Tuir nia, PNTL lakohi fó sai manifestante ne’e nia identidade tanba segredu justisa, maibé em prinsipiu manifestante ne’e submete ona ba prosesu identifikasaun.
Nia dehan, durante manifestasaun ne’ebé halo husi Estudante Universitariu Timor-Leste (EUTL) hahú husi loron 15 to’o 16 Polísia Nasionál Timor-Leste (PNTL) rejista kazu krime tolu.
“Hahú husi loron dahuluk Estudante Universitariu Timor-Leste halo saida to’o mai iha loron daruak ne’e teknólojia CCTV no Drom grava buat hotu ne’ebé estudante sira halo” dehan nia.
Alende ne’e, Nia dehan, husi estudante nain 12 inklui mós ema estranjeiru ida ne’ebé ho motór tu’ir hela manifestante sira nia kotuk deskonfia fahe osan ba manifestante sira.
“Prosesu sei la’o, ha’u lakohi ko’alia kona-ba kestaun polítiku nian prosesu identifikasaun sei la’o ba aktu sira ne’ebé polísia halo, maibé nain la’ós fraglante Delitu depois mak prosesu ne’e sei la’o” tenik nia.
Nia dehan, manifestasaun ne’ebé mak halo husi EUTL ne’e manifestasaun ne’ebé real no laiha partidu polítiku balu mak iha manifestante sira nian kotuk hodi apoiu sira.
“Manifestasaun ida ne’e real, manifestasaun ne’e organiza husi estudante universitáriu”, nia dehan.
Karik iha terseira pesoa iha manifestaun ne’e, polísia sei halo identifikasaun no karik iha aktu violensia ruma polísia sei halo identifikasaun.
Jornalista : Chay Risky