Loluwari Média (Díli) – Estudante Universitariu Timor-Leste (UETL) marka Vitoria foun ne’ebé konsege susesu halo manifestasaun hasoru Parlamentu Nasionál kona-ba sosa prado, Lei Pensaun Mensal Vitalísia no Lei Manifestasaun 100 metru.
Maske nune’e,sosa karreta kansela no akordu husi bandaka lima iha PN asina ona maibé sei hein debate jeneralidade iha loron 25 semana oin ba Pensaun Vitalísia no Altera Lei 100 metru manifestasaun.
Portavós Estudante Universitariu Timor-Leste (EUTL), José Dos Santos Freitas hatete, Estudante Universitariu Timor-Leste hamutuk ho Sosiedade Sivil no Komunidade ema ho difisensia hamutuk loron tolu luta konsege konkista Vitória foun.
“Ita nia Vitória mak Deputadu 65 Kansela sosa kareta Prado, no ohin ita konsege asina akordu katak sei halakon lei pensaun Vitalisia no Alterasaun ba Lei metrus 100 sei halao diskusaun iha loron 25 iha Parlamentu Nasionál ko’alia kona-ba akordu ne’ebé ohin ita asina.” Dehan Portavós Estudante Universitariu Timor-Leste (EUTL), José Dos Santos Freitas ba Manifestante sira iha Resintu UNTL kaikoli Dili, kuarta (17/09)
Vitória ida ne’e,Nia dehan, laos ema ida nian maibé Vitória ne’ebé ohin hetan ne’e ba povu maubere-oan oan sira hotu nian liu-liu ba Estudante Universitariu sira iha Timor-Leste.
“Ohin loron Vitória laos tau iha bandeza mak fo ita maibé ita Maubere oan nia luta no balun fakar ran balun tohar balun han gas Lakrímujenio no fasilidade PNTL balun estraga no karreta balun hetan sunu mak foin ita hetan Vitória”dehan nia.
Nia esplika,estudantes sira balun oras ne’e sei halao tratamentu saúde iha Hospital Nasionál Guido Valadares tanba konsekuensia husi Manifestasaun.
Durante manifestasaun,Tuir nia,autoridade seguransa PNTL loron hira duni malu tuda malu no tiru Gas Lakrimojenu halo manifestante sira balun tanis no triste tanba hakarak defende povu no rai ida ne’e.
“Tanba luta laos fasil maibé ita tenke sakrifíka an hodi hetan Vitória”dehan nia.
Tanba ne’e,Nia esplika, debate OJE 2026 tenke Aloka orsamentu Estadu ba setor produtivu mak hanesan Agrikultura, Edukasaun, Saúde no turismu ne’ebe iha asina akordu laran.
Enkuantu Akordu ne’ebé EUTL asina hamutuk husi Bankada CNRT, PD, PLP, Fretilin no KHUNTO iha uma fukun Parlamentu Nasionál sai baze forte ba manifestante sira hodi debate semana oin.
EUTL sei pauza manifestasaun hodi hein no akompaña rejultadu plenaria iha loron 25 fulan Setembru tinan ne’e mak hafoin EUTL kontinua luta no halao manifestasaun bainhira PN seidauk iha votu Unanimidade.
Entretantu iha asina akordu ne’e mak reprezentante husi CNRT Deputadu Patrocínio Fernandes,FRETILIN reprezenta Deputadu Nurima Ribeiro Alkatiri,Bankada PD reprezenta husi Deputadu Manuel Henrique Noronha,KHUNTO reprezenta husi deputadu Antonio Verdial no ikus PLP reprezenta husi Maria Angelina Lopes.
Enkuantu proposta lei ne’ebé FRETILIN ho PLP prepara ona mak rejime juridiku de seguransa sosiál dos Titulares dos orgaun de Orgaun soberania.
Jornalista : Chay Risky