Loluwari Média (Díli) – Ekipa Konjunta Unidade Patrullamentu Fronteira (UPF) hamutuk ho Aduanéiru Alfándega, Autoridade Inspesaun Fiskalizasaun Atividade Ekonómika Sanitária Alimentár Intitutu Públiku (AIFAESA,IP) karantina no Imigrasaun komesa hala’o pasa revista ba transporte sira ne’ebé tama sai Fronteira to’o fulan Dezembru.
Komandante Unidade Patrullamentu Fronteira (UPF), Superintendente Polísia, Euclides Belo, hatete, Ekipa konjunta hala’o pasarevista ba Transporte Públiku no Privadu hodi kontrola sasan ne’ebé tama sai iha liña Fronteira.
“Tanba ne’e mak UPF no Komandu Munisípiu Bobonaro no Eskuadra Balibo ita apoiu Alfaesa, Alfándega, Karantina, no Imigrasaun ne’ebé destaka iha Mota ain ita reforsa hodi halo pasarevista husi Fulan Novembru ate Dezembru Tinan ne’e atu garantia ita nia liña Fronteira liu-liu sasan tama no sai.” Dehan Komandante Unidade Patroillamentu Fronteira (UPF), Superintendente Polísia Euclides Belo ba jornalista Loluwari.tl iha Postu Fronteira Batugade, Sabadu (15/11).
Euclides hatete, iha semana kotuk Karreta Estadu ida transporta hela sasan kontra bandu liu-liu Fugetes, tanba ne’e UPF no Komandu Munisípiu Bobonaro Alfandega servisu hamutuk fulan 2 hodi halo pasarevista ba kualkér transporte ne’ebé tama no sai iha liña Fronteira.
“Ami esperansa katak ita nia sidadaun hotu-hotu ne’ebé tama no sai iha liña Fronteira tenke kumpri regras hodi ba loos mai loos hola nesesidade karik hola ho nesesidade báziku laos hola fali Fugetes liu-liu sasan ne’ebé kontra bandu”dehan nia.
Tuir Nia,hahú sesta-feira Alfaesa reforsa UPF hodi halo fiskalizasaun ba sasan sira ne’ebé mak negosiante sira lori ba faan haree mós nia kualidade atu nune’e sasan ne’ebé sidadaun Timoroan sira faan ne’e tenke priense rekezitu saúde nian labele liu prazu no kondisaun ladi’ak hodi estraga ema nia saúde.
UPF ho Instituisaun sira ne’ebé iha Fronteira servisu hamutuk halo estasionamentu pasarevista laiha esepsaun seluk, UPF sempre nakloka ba Instituisaun sira seluk atu servisu hamutuk hodi garantia liña Fronteira.
“Horseik (Sesta-feira) ami detekta Fugetes no objetu sira seluk ne’ebé ami Prende hodi supmete ona ba Eskuadra Balibo no orsida sei enkamiña ba Komandu Munisípiu Bobonaro”dehan nia.
Tanba ne’e,Euclides espera katak ho medida ne’ebé autoridade seguransa foti ne’e bele sai edukasaun ida ba sidadaun hotu-hotu katak Fugetes ne’e so bele hatama bainhira iha karta lisensa.
“Bainhira laiha karta lisensa mak ami sei Prende hotu no bainhira see deit mak lori mós ami sei halo apresaun no ba prosesu indentifikasaun tuir lei haruka”dehan nia.
Ekipa konjunta konsege prende sasan kontra bandu liu-liu Fugetes ne’ebé liu-husi via Maritima tama mai teritóriu TL nian ho objetivu ne’e atu ba dili ou Munisípiu sira seluk maibé ho servisu kolaborasaun ne’ebé kapaas bele halo apresaun.
“Pasarevista ne’ebé ami halao sei to’o fulan Dezembru atu hatudu ita nia peizu ida katak ita sivilizadu sosa sasan mós ida ne’ebé legal laos sosa sasan ida ne’ebé la koresponde ba ita nia lei iha TL”dehan nia.
UPF ho TNI mós sei servisu hamutuk hodi preparasaun ba Natal no Tinan foun liu-husi pasarevista bainhira sidadaun sira ne’ebé gosta sosa Fugetes mak sei simu nia konsekuensia.
Iha fatin hanesan, Diretora Alfaesa Departamentu Operasaun, Claudina Sarmento, hatete, Ekipa konjunta husi PNTL liu-husi Unidade Patrullamentu Fronteira ho Alfaesa halao pasarevista atu garante seguransa no sasan tama no sai iha liña Fronteira.
“Durante loron 2 ekipa konjunta halo pasarevista no Inspesaun ba kamioñeta hamutuk 20 ne’ebé transportasaun sasan mai husi Indonézia”
Tuir Nia, husi 20 kamioñeta ne’ebé ekipa halo Inspesaun ba produtu alimentares no mós laos alimentares ne’ebé mak Aifaesa fó ona konvikatoriu ba operador ekonomika ne’ebé transporta mai TL no ba Munisípiu sira seluk.
Sasan Alimentares ne’ebé tama mai TL Ekipa konjunta halo rekomendasaun ba sira atu kumpri ba rejimentu ne’ebé iha ona atu garante nia kualidade.
“Aktividade ne’ebé ami halao ne’e bazeia ba lei ne’ebe preve ona iha dekretu lei numero 29 kona-ba transportasaun”dehan nia.
Alfaesa tenke garantia kondisaun transportasaun ba iha produtu sira ne’ebé atu transporta ba iha fatin ida ba fatin seluk no mós husi nasaun seluk mai tama teritóriu TL atu nune’e produtu sira ne’e seguru ba konsumidores sira.
Jornalista : Cesar Pires
Editór: Herminio Cardoso