Loluwari Média (Díli) – Prezidente Repúblika (PR), José Ramos Horta, hala’o vizita privadu no traballu ba Davos, Suisa, husi loron 20 to’o 23 janeiru 2026, hodi partisipa iha Enkontru Anuál Fórum Ekonómiku Mundiál (WEF).
Forum tinan ida-ne’e, ho tema “Espíritu Diálogu nian”, konvoka líder globál sira husi Governu, emprendedór no sosiedade sivíl sira hodi partilla dezafiu jeopolítiku, ekonómiku no ambientál sira ne’ebé urjente.
Prezidente Ramos-Horta nia partisipasaun Timor-Leste nia kompromisu ba envolvimentu multilaterál ne’ebé konstrutivu no ninia papél proativu hodi fornese solusaun kolaborativa sira.
Durante vizita, Prezidente nia kompromisu sira sei foka ba tema krítiku sira relasiona ho dame, kreximentu inkluzivu no rejenerasaun ambientál.
Tanb ne’e Iha loron 21 janeiru, Presidente Ramos-Horta sei partisipa iha diálogu estratéjiku nivel aas nian, inklui enkontru informál ida husi Líder ekonómiku mundiál sira (IGWEL) kona-ba “Restaura Espíritu Diálogu iha Mundu ne’ebé fahe malu” no Diálogu ho Parte interesada sira ho títulu “Tau Empreendedór sira iha Fatin ne’ebé Merkadu laiha.”
Alende ne’e Presidente mós sei tuir sesaun ida ne’ebé organiza husi globál Citizen no Forbes,Iha loron 22 janeiru, ne’ebé sei hato’o diskursu prinsipál iha eventu paralelu importante rua.
Primeiru, “Plástiku Neutrál Globál: Transforma Poluisaun ba Serbisu no Infraestrutura,” sei ezamina hodi transforma krize poluisaun plástiku ba oportunidade ida ba empregu verde no infraestrutura sustentável.
Segundu, “Empregu Rejenerativu Millaun 100: Rekonstrui ekonomia lokál sira dezde Baze liu-husi sistema Ai-han, Turizmu, no Asisténsia,” sei destaka modelu rejenerativu sira hanesan dalan sira ba restaurasaun ekolojia no ekonomia komunitária sira ne’ebé reziliente.
Itineráriu Prezidente nian inklui mós série enkontru bilaterál ho figura xave internasionál sira no prezensa iha Jantar Sidadaun Globál.
“Iha mundu ida ne’ebé dala-barak nakfera tanba konflitu no deskonfiansa, ‘Espíritu Diálogu’ la’ós de’it tema ida maibé nesesidade ida Timor-Leste nia jornada rasik hanorin ita katak pás no prosperidade ne’ebé metin harii liu-husi konversa persistente no respeitoza no kompromisu kompartilhadu ho bem komún”
“Iha Davos, hau sei lori ita-nia povu nia lian, advokasia ba kooperasaun globál ne’ebé investe iha dame, fó kbiit ba empreendedór sira, no proteje ita-nia planeta ba jerasaun sira iha futuru.”dehan PR Horta.
Prezidente nia partisipasaun iha Fórum Ekonómiku Mundiál reafirma Timor-Leste nia papél ativu iha diálogu internasionál no ninia dedikasaun ba parseria hodi buka solusaun ba asuntu globál sira.
Jornalista : Cesar Pires
Editór : Herminio Cardoso