Loluwari Média (Díli) – Primeiru Ministru (PM), Kay Rala Xanana Gusmão husu Ministra Finansas (MF) hamutuk ho nia Vise tenke koordena malu hodi fahe servisu durante mandatu Nono governu to’o remata.
Konfiansa ne’e,PM Xanana husu atu governante na’in rua ne’e tenke fahe servisu hodi hadia sistema finanseiru ho di’ak molok mandatu remata.
“servisu di’ak,vise servisu ho di’ak,Ministra servisu ho didi’ak koordena ba malu,fahe servisu ba malu bainhira ita nia mandatu remata ita nia sistema finanseiru lao ho di’ak”Dehan Primeiru Ministru (PM), Kay Rala Xanana Gusmão ba jornalista sira iha Palásiu Prezidensiál Bairo-Pite Díli, kuarta (12/02).
PM Xanana haktuir Ministra ho Vise tenke hadia sistema Finanseiru ne’ebé governu Anterior kria hodi muda ona,ne’ebé tenke hadia fila-fali atu lao ho di’ak.
Alende ne’e mós,PM hatete,tenke tau atensaun mós ba Finansas iha munisípiu tomak tanba la kleur tan atu tama ba desentralizasaun poder lokál.
“ne’ebé parabéns no bom traballu ha’u nia konfiansa tomak ba ita boot (Ministra) ha’u sei ezije imi nain rua servisu ho fuan ho ulun”dehan PM.
Entretantu Prezidente Repúblika (PR), José Ramos-Horta fó pose ba Regina de Jesus de Sousa nu’udar Vise-Ministra Finansas foun ba mandatu restu husi IX Governu Konstitusionál.
Tanba nomeasaun ne’e formaliza tuir dekretu Prezidente Repúblika Nú. 17/2026.Regina de Jesus de Sousa troka eis Vise-Ministra Finansas Felícia Claudinanda Cruz Carvalho ba mandatu restu.
Regina de Jesus de Sousa nu’udar espesialista finansas ho esperiénsia liu tinan 20 iha Ministériu Finansas ho nia koñesimentu tékniku nivel aas iha Jestaun Finansas Públikas (PFM) ba nia pozisaun foun.
Vise MF ne’e nu’udar eis-Diretora Jerál Tezouru nian, nia sai instrumentál hodi asegura integridade, efisiénsia, no transparénsia ba sistema finanseiru estadu nian.
Ninia lideransa kobre área estratéjiku sira inklui kontabilidade nasionál, operasaun tezouru nian, ezekusaun orsamentál, no jestaun pagamentu, ne’ebé diretamente apoia polítika governu no reforma Jestaun Finansas Públikas nian.
Koñesidu ho nia abilidade analítika no koñesimentu konformidade, nia iha istória forte ida kona-ba harii ekipa, promove kooperasaun entre ajénsia sira, no fó konsellu ba órgaun estadu sira kona-ba asuntu orsamentál sira.
Nia esperiénsia aumenta ona liu-husi formasaun internasionál avansadu ho FMI no ADB, ne’ebé foka ba modernizasaun tezouru, sustentabilidade dívida, no polítika fiskál.
“Ha’u iha konfiansa tomak katak Sra.Regina de Jesus de Sousa sei lori nia perísia esepsionál, integridade ne’ebé metin, no kompromisu kle’an ba servisu públiku ba papél vital ida ne’e” tenik PR.
PR Horta reforsa,vise MF ninia lideransa sei sai krusiál hodi promove estabilidade ekonómika TL nian, garante disiplina fiskál, no reforsa fundasaun governasaun di’ak ba benefísiu povu Timor-oan tomak nian.
Jornalista : Cesar Pires
Editór : Herminio Cardoso