Loluwari Média (Díli) – Prezidente Repúblika (PR), José Ramos Horta ho nia ekipa apoiu nesesidade bázika hanesan bebidas ba Pasiente moras dengue iha Hospitál Nasional Guido Valadares (HNGV) inklui iha Karantina Tasi-tolu.
PR Horta oferese bebidas ba pasiente sira ne’e tanba pasiente sira ho númeru dengue ne’ebé aumenta barak bainhira iha nia vizitasaun primeru.
“Foin daudaun ha’u mai mesak, ha’u mak fahe rasik bee ba pasiente dengue sira, maibé ha’u haree ema (pasiente) barak loos, ne’e dunik ha’u rasik telefone ba kompañia bee Leste hodi fó gratuita ba pasiente dengue iha HNGV no Karantina Tasi-tolu no ohin ha’u lori mós ho Ai-fuan no mós jus, guavas ba sira hodi hemu tanba ne’e di’ak loos ba moras dengue.” Dehan Prezidente Repúblika (PR), José Ramos Horta ba jornalista sira iha iha Hospital Nasional Guido Valadares Bidau Díli, kuarta (18/02).
PR Horta mós apresia Doutor no enfermeiru sira nia servisu ne’ebé todan,dala-barak sira hetan krítika oi-oin, husi públiku maibé kondisaun mak ne’e.
Primeiru doutor no enfermeiru, staff sira servisu iha HNGV servisu todan, servisu di’ak, kondisaun servisu hospitál todan, di’ak iha Austrália ka iha Indonézia nian. Tanba HNGV ne’e infraestrutura ne’e difisil tanba la konsege simu moras sira ho kualidade, maibé sira servisu di’ak ho kondisaun ne’ebé iha doutór, enfermeiru, parteira, staff sira hotu-hotu servisu di’ak.
“Kualidade hahan ne’e di’ak, hahan ne’e tuir menu ne’ebé nutrisionista sira hatete, ha’u haree loron ida ha’u mai ema seluk laiha, ha’u mai haree hahan di’ak, ha’u ba to’o dapur,maibé balun labarik sira la gosta han ne’e normál, sira hakarak hahan uma nian, maibé ha’u haree kualidade hahan ne’e di’ak, isufisiente.”dehan nia.
Tenke kuantidade ne’ebé sukat didi’ak espesialista sira sukat, konforme doutór sira rekomenda, ida ne’e tenke han nune’e sira iha dapur halo tuir de’it instrusaun ne’ebé mai husi doutór sira.
“Ha’u haree servisu todan, ha’u rona mós jestaun di’ak liu konforme doutór sira estranjeiru hatete, sira haree diresaun hospitál di’ak liu,maibé, bainhira edifisiu sira ne’e la muda, laiha edifisiu foun, ekipamentu sufisiente ne’e susar”tenik PR.
Alende ne’e, atu halo deteta ba moras kankru susun nian, ne’e laiha ekipamentu, mais iha Prezidensia Repúblika iha mákina ida deteta leno haree didi’ak.
“Mais em jerál ha’u hatete, ha’u agradese ba doutór, enfermeiru sira servisu sira ne’e susar tebe-tebes”dehan PR.
Iha fatin hanesan, Diretor Ezekutivu Hospital Nasional Guidu Valadares (HNGV), Nuno Vital, agradese ba Prezidente Repúblika nia vizita ba iha HNGV.
Entretantu pasiente dengue ne’ebé oras ne’e sei baixa iha HNGV no Tasi-tolu totál hamutuk 164 no tasi-tolu hela na’in 45.
Jornalista : Cesar Pires
Editór : Herminio Cardoso