Loluwari Média (Díli) – Komandante Munisípiu Díli (KMD), Superintendente Xefe Polisia, Orlando Gomes, hatete, akontesimentu iha Bebonuk Servisu Sekreta ho Servisu polisia Eskuadra Dom Aleixo kaptura Sidadaun Xinexa na’in ida hodi detein ba 72 molok aprezenta ba MP.
“Akontesimentu ne’e ita nia informasaun sekreta detekta hodi informa mai iha komandu, no komandu ba foti sai vitima iha apartamentu Bebonuk hodi lori mai para halo Investigasaun no kazu ne’e rasik ita halo ona prosesu no suspeitu mos ita detein ba iha 72 oras no ita sei aprezenta ba Ministeriu Publiku (MP).” Dehan Komandante Munisípiu Díli (KMD), Superintendente Xefe Polisia, Orlando Gomes, ba jornalista sira iha Eskuadra Dom Aleixo Aimutin Dili, kuarta (04/12).
Gomes esplika, motive husi kazu ne’e suspeitu bosok vitima mai Tmor-Leste nune’e servisu iha suspeitu nia apartementu hodi fo benefisiu ba maibé vitima hetan tortura suspeitu nune’e PNTL munisipiu Dili hetan informasaun husi servisu intelijensia hodi ba kapturasuspeitu.
“Kazu ne’e iha motivu tanba husi suspeitu sira bosok vitima para mai Timor-Leste nune’e suspeitu bele hetan benefisiu maibé tanba ho sira nia asaun krime ne’ebé sira komete mak sira halo torturasaun no kesi vitima iha kuartu laran no ita konsege detekta no ita foti vitima mai iha Komandu Dili presta deklarasaun depois ita halo kapturasaun ba suspeitu mai detein ba 72 oras.”
Tuir informasaun suspeitu durante me’e halo negosiu iha Timor-Leste no ba bosok nia maluk Xinexa (Vitima red) atu mai servisu ikus mai suspeitu halo asaun tortura hasoru vitima.
“Suspeitu mai husi nasaun Xina suspeitu durante iha Timor-Leste hala’o negosiu depois mak nia halo asaun ida ne’e ba nia maluk, nune’e nu’udar Autoridade seguransa PNTL asegura vitima iha KMD no sei entrega ba Embaxador Xina no ba Asosiasaun Xinexa.
“Horseik sira mai haree vitima no sira hein prosesu kontinuasaun iha MP, suspeitu ho inisial LC no Vitima naran Zheng Pui Long, tanba kazu ne’e ami konsidera kazu sequestru tanba ne’e tenke prosesu ba tribunal.”
“Kazu ne’e rasik foin akontese husi ema Estranjeiru Xinexa sira mak halo torturasaun ba malu, nune’e PNTL rejista ho numeru Nuk 0863/24.
Jornalista : Chay Risky
Editór : Ilima’a