Loluwari Média (Díli) – Komandante munisípiu Díli (KMD), Superintendente Xefe Polisia, Orlando Gomes, hatete, polisia kaptura suspeitu ida iha Pertamina Aitula Fuel, Comoro bainhira Motorista Mikrolet 011 ida ense hela mina no vitima konduz motor atu ba ense mina no Motorista konsege asaltu ba vitima ho nia motor inklui xefe suku Samara munisipiu Ermera
“Kazu ida ne’e ita buka tu’ir suspeitu no ita konsege kaptura mai iha eskuadra Dom Aleixo nune’e ita halo identifikasaun no ita sei halo kontinuasaun ba prosesu.” Dehan Komadante Munisípiu Díli (KMD), Superintendente Xefe Polisia, Orlando Gomes, ba jornalista sira iha eskuadra, Dom Aleixo Aimutin, Dili, tersa (10/12).
Gomes hatete, aktu ne’ebé motorista halo hasoru joven no autoridade lokal ne’e krime, tanba hetan asaltu husi motorista mikrolet 011 nian no vitima mai hato’o ba keisa iha eskuadra Dom Aleixo no Polísia Eskuadra Dom Aleixo kaptura ona suspeitu mai halo prosesu.
“Ita sei halo prosesu normal no hein orientasaun husi Ministeriu Publiku (MP) bainhira detein ita tanba MP mak na’in ba prosesu ne’e no suspeitu na’in rua mak oras ne’e daudaun iha ona Eskuadra Dom Aleixo.”
Vitima, Abilio Braz dos Santos, hatete, problema ne’e akontese iha domingu dia 08 kalan, iha pertamina Aitula, vitima ho Xefe Suku Samara, postu administrativu Hatolia A munisípiu Ermera, bainhira ba ense mina iha parte numeru 01 maibé sira hatan dehan bainhira selu ho osan ense iha ne’e bainhira ho kupon ba ense iha numeru 03.
“Nune’e ha’u muda motor ba numeru 03, ba iha numeru 03 motorista mikrolet 011, ho kondisaun mak lanu no hase ha’u ho lian makaas maibé ha’u hatan ba nia dehan ita ko’alia neneik de’it maibé nia nafatin hakat mai ha’u hodi tuku hau nia hasan karuk no husu tan ha’u dehan ita bo’ot “warga” maibé ha’u dehan, iha ha’u nia moris tomak ha’u la inklina an iha artemarsiais no arte rituais.”
Nune’e nia husu ba Xefe suku dehan kontaktu ba parte seguransa de’it no iha fatin suspeitu hatan imi telefone sese de’it nia la tauk no nia baku nia hirus matan dehan ne’e bala musan nia oan.
“Nia langsung mai tuku makaas iha hau nia kotuk ho makaas ha’u ses an husi motor leten no ha’u hakiduk no ha’u tahan ho ha’u nia liman to’o ha’u monu iha aifunan to’o sira husik ha’u no sira halai.”
“Vitima fila ba nia uma no sente la menta tebes ho aktus hirak ne’e nia deside ho autoridade lokal ne’e ba kedas Eskuadra Dom Aleixo hodi halo keisa nune’e parte Autoridade seguransa buka tu’ir suspeitu sira ne’e no vitima konssege hetan Mikrolet 011 ne’e hakerek ho Loading 2025 ho evidensia ne’e mai hato’o keisa iha Eskuadra Dom Aleixo.
“Ami ho seguransa ba iha pertamina Aitula haree CCTV joom maibé ami la hetan nia sapa matrikula no ami husu tu’ir ba Motorista 011 ne’e no motorista sira hatene hela no dehan mikrolet ne’e naran Divers no momentu kalan ne’e ami buka tu’ir iha Delta, ami la hetan ami ba fali Pantai Kelapa no ami hetan mikrolet ne’e nia imajen no ami fila mai uma hodi deskansa. Ohin dader tuku 8 ha’u mai fali iha Eskuadra Dom Aleixo suspeitu mai entrega an ona.”
Jornalista : Chay Risky