Loluwari Media (Baucau) – Ministru Defeza (MD), Kontra Almirante Donanciano Costa “Pedro Klamar Fuik”, hatete, selebrasaun aniversariu komponente Tereste ba 22, husu ba forsa Armada, Timor-Leste sai nu’udar autoridade seguransa sakrifika no dedikasaun ba patria.
“Ita nia istoria Timor-Leste marka ho indepedensia nasionál nune’e ha’u husu ba veteranus no antigu kombatente sira ne’ebé dedika sira nia an no servi ita nia rai ho sakrifisiu no dedikasaun tomak ba sentidu homenagen, tanba ohin loron ita nia nasaun.” Dehan Ministru Defeza (MD), Kontra Almirante Donanciano Costa “Pedro Klamar Fuik” iha nia diskursu ba komemorasaun aniversáriu komponente Terestre, ba dala 22 iha Baucau, sexta (13/12).
Governante ne’e hatete, komponente Terestre ne’ebé selebra nia aniversáriu ba dala 22 sai nu’udar Forsa ne’ebé professional no moderniza atu sai seguransa ida ne’ebé diak ba povu no nasaun.
“Ha’u husu ba veteranus no antigu kombatente sira imi nia servisu pilar esensiál tebes ba sosiedade nia hamutuk hodi asegura prosperu ne’ebé sai inspirasaun ba jerasaun foun sira nia futuru.”
“Matein imi nia patriotizmu hodi inspira jerasaun foun, tanba servisu F-FDTL nia kareira sai nu’udar misaun onradu no kompromisiu ba ita nia patria no fo homenagen ba Martires sira hotu no herois da patria nia sakrifísiu no dedikasaun tomak ho sira nia vida, ita hetan ita nia libertasaun independensia.
“Ha’u nia agradese no desezu ba imi feto no mane ne’ebé servi Timor-Leste liliu ba F-FDTL husi komponente Tereste ohin selebra nia aniversáriu ba dala 22 atu refleta komprimisiu, imi nia juramentu ba Bandeira ba futuru ne’ebé livre no determinadu tanba komponente Terestre sai nu’udar transformasaun ba nasaun nia modernizasaun.”
Xefe Estadu Maiór Jenerál Forsa Defeza Timor-Leste (F-FDTL), Tenente Jenerál Domingos Raul “Falur Rate Laek”, afirma, selebrsaun aniversariu komponente Terestre ba dala 22, husu ba membru F-FDTL atu hanoin hikas pasadu ne’ebé moruk ba heroino no heroina sira nia dedikasaun no abnegasun kumpri sira nia misaun ne’ebé iha tempu defisil nia laran.
“Permite ha’u fo ha’u nia saudasoes ba eis Komandante Falintil sira no Komandante sira seluk ne’ebé dedika sira nia an tomak tanba ho sira nia dedikasaun no sira nia an tomak ba lori sakrifisiu tomak tanba ne’e mak ita nia dever tomak ita tenke hanoin sira tanba sira nia dedikasaun sai exemplu ba ita hotu.”
Xefe Estadu husu ba estrutura komponente terestre atu mantein estrutura forsa iha teritoriu nasionál no prontu atu involve iha operasaun iha kualker momentu ba interese nasionál.
“Forsa ne’ebé preparadu nafatin atu responde ba situasaun ne’ebé ezije atu uza forsa Militár komponente terestre sai nu’udar kuadru, orgullu nasionál no esensiálmente enkarna valor as ba patriotizmu no ba sidadania sira.”
“Ohin ita selebra orgullu no paisaun ba legitimu marka historia iha ita nia rai, ita tenke fo homenagen dignu ba mane no feto sira ne’ebé servi ita nia legitimu ba auto determinasaun ba sira ida-idak nia vontade luta hasoru dezafiu no perigu oi-oin ba herois sira hotu kuñesidu no deskoinesidu ita hotu nia hakruk no respeitu.”
Total membru komponente Terestre daudauk ne’e hamutuk atus sia resin ne’ebé uza farda F-FDTL atu servisu nobre hodi servi atu nune’e instituisaun F-FDTL sai modernu no demokratiku no respeita ba orden Konstitusionál ho kbi’it atu defende garantia no proteze integridade teritoriu nasionál no prepara militár profisional hodi hala’o Defeza militár no fo apoiu ba autoridade sivil sira hodi hadia populasaun nia moris diak.
Jornalista : Chay Risky