Loluwari Média (Díli) – Xefe Estadu Maiór Das Forsa Defeza Timor-Leste (F-FDTL), Brigadeiru Generál, José da Costa Soares “Trix”, hatete, Forsa Defeza Timor-Leste (F-FDTL) no Polísia Nasionál Timor-Leste (PNTL) servisu hamutuk atu asegura situasaun Geral iha teritoriu Timor-Leste.
“Ita nia forsa konjunta husi Komponente Navál, Unidade Polísia Militár (PM), Unidade Falintil (UF), Corpu Seguransa Pesoál (CSP), Corpu Operasaun Espesial (COE), Unidade Patrullamentu Fronteira (UPF), Unidade Tranzitu nomos komandu Jeral, ohin parada atu ezekuta tan rejolusaun ne’ebé ita nia governu foin lalais ne’e aprova iha Parlamentu Nasional nune’e ita nia Xefe Estadu Maiór Jenerál F-FDTL no Komisáriu Jerál PNTL nia diretiva atu halo misaun konkreta iha loron bo’ot Natal no Tinan foun.” Dehan Xefe Estado Maiór Forsa Defeza Timor-Leste (F-FDTL) Brigadeiru Generál, José da Costa Soares “Trix”, ba jornalista sira, iha Unidade Espesial Polisia (UEP) Bairro-Pité, Dili, sexta, (20/12).
Trix esplika, Forsa konjunta ohin hala’o parada jeral bazeia rejolusaun governu atu fo seguransa ba loron bo’ot Natal tinan 2024 no tinan foun 2025.
“Ita nia diretiva ne’e pontu importante ida de’it, mak atu ita kaer estabilidade iha festa Natal no ano novu ba tinan ida ne’e ho di’ak, ita tenke prevene situasaun ne’ebé ita hotu la espera atu nune’e ita nia Natal no tinan foun ida ne’e la’o ho diak hodi ita nia povu husi munisípiu 13 inklui RAEOA ho hakmatek ho nia familia.”
Trix argumenta atu povu lao livre iha tempu loron no kalan durante natal no tinan foun mak sai objetivu parada forsa konjunta ida ne’e bainhira se de’it mak perturba ordem publika F-FDTL no PNTL labele tolera, no tenke asegura liliu kriminozu sira ne’e labele tolera.
“Ha’u husu ba parada se de’it mak kria instabilidade no halo pertubrasaun ba movimentasaun ba ita nia populasaun liliu ba ita nia inan-aman sira ne’ebé hakarak atu festeza ba natal no ano novu forsa konjunta sei la tolera.”
Husi sorin séluk Komandante Operasaun, Superintendente Xefe Polisia, José Soares, hatete, rejolusaun governu ba daruak fo kompetensia ba Instutisaun seguransa F-FDTL no PNTL servisu hamutuk atu garantia estabilidade iha pais ida ne’e ba festa Natal no tinan foun.
“F-FDTL no PNTL la bandu sidadaun sira atu hemu tua maibé hemu karik iha nia uma, labele hemu iha estrada publiku atu pertubra ordem públiku mak PNTL no F-FDTL sei la tolera no inpoin bazeia ba lei no orden atu bele garantia seguransa ba ema hotu.”
F-FDTL-PNTL sei koordena servisu ho Komandu munisípiu sira no forsa destakadu sira atu fo seguransa iha Fronteira iha tasi no mos iha rai maran atu halo patrullamentu konjuta hodi fo seguransa ba Natal no tinan foun.
Jornalista : Chay Risky