Loluwari Média (Díli) – Ministru Interiór (MI), Francisco Guterres, hatete, atividade limpeza ba parede ne’ebé marka ho simbolu grupu artemarsiais (GAM) no grupu arterituais (GAR) iha sidade Dili liliu dalan protokolu ne’ebé nakonu ho simbolu (GAM-GAR).
“Ohin ita lansa atividade hamoos parede ne’e nu’udar governu nia komprimisiu seriu hodi tau atensaun ba hahalok grupu arte marsial no arte ritual ne’ebé mak iha komunidade no ba joven tanba nasaun ne’e laiha grupu no Artemarsiais mak bo’ot liu.” Dehan Ministru Interiór (MI), Francisco Guterres, ba jornalista sira iha Eskuadra Dom Aleixo Ai-mutin, Dili, segunda (23/12).
Ezekutivu ne’e hatete, Ministeriu Interior hamutuk ho Komandu Polisia Nasional Timor-Leste (PNTL) no Autoridade Lokal akompaña husi Komisaun Reguladora Arte Marsial (KRAM) halo limpeza hamoos parede ne’ebé marka ho simbolu (GAM) no (GAR) iha dalan publiku liliu iha sidade Dili.
“Ohin ne’e ita halo lansamentu ida hamutuk ho KRAM, iha ne’e polisia no autoridade lokal atu hamoos tiha simbolu arte marsial no arte ritual sira ne’ebé hakerek iha dalan publiku atu labele hamosu rivalidade ida ne’ebé mak nakloke to’o ikus kria problema iha komunidade nia le’et.”
Governante ne’e husu ba komunidade sira atu kontrola nune’e labele iha individu ida ka grupu ida atu pinta parede sira ho simbolu arte marsial no arte ritual.
“Ha’u husu ba ita bo’ot sira hotu kontrola fatin sira ne’e ajuda hela polisia no KRAM no institusaun sira seluk atu ita hadia ita nian sidade Dili no hanorin ita nia arte marsial sira ne’e bele partisipa ativamente iha dezenvolvimentu nasional.”
Nia argumenta bainhira iha grupu arte marsial no ritual balu mak pinta hikas simbolu arte marsial mak komunidade hetan aktu ne’e konsidera krime no sei prosesa tu’ir lei,.
“Se de’it mak komesa kria fali tensaun iha komunidade nia le’et ne’e lei iha atu lori ba Tribunal tanba ne’e dezovidensia kuandu desovidensia ne’e krime. Tanba ne’e mak ita husu komunidade sira mos tenke ho laran kmanek atu bele tau matan.”
Reprezentante Komandante Jeral PNTL, Superintendente Xefe Polisia, Jose Soares, hatete, inisiativa diak husi Komandu PNTL munisipiu Dili hamutuk ho autoridade munisipiu Dili no autoridade lokal no Komisaun Reguladora Arte Marsial halo limpeza iha Dili liliu atu hamoos parede sira ne’ebé marka ho simbolu arte marsial no ritual.
“Ohin ita halo limpreza ida ne’e iha Dili, husu hotu-hotu atu koopera, kuandu iha individu ida mak tenta viola ida ne’e mak nia kontinua riska parede hodi pinta simbolu arte marsiais sira nian ne’e sala.”
Husu ba joven sira atu muda hanoin ne’ebé ladun diak hodi muda aan ba dalan ne’ebé diak hodi kontribui ba estabilidade nasional.
Prezidente KRAM Octavio da Conçeição, hatete, KRAM hamutuk ho Ministeriu Interior, Komandu PNTL no Autoridade Lokal halo limpeza hodi hamos simbolu arte marsial no arte ritual sira ne’ebé marka iha Parede no dalan protokolu iha Dili laran.
“KRAM simu orientasaun husi Ministru Juventude Desportu Arte no Kultura (MJDAK) servisu hamutuk ho autoridade munisipiu Dili no Komandu PNTL Munisipiu Dili hala’o limpeza hodi hamoos simbolu arte marsial no arte ritual sira ne’ebé mak joven no pratikante arte marsiais no arte ritual ne’ebé marka iha Parede no uma iha dalan protokolu Dili laran.”
“Ida ne’e nu’udar dalan ida atu ita eduka malu no ita respeita ita nia orden publika labele kria kondisaun sira ne’ebé hamosu dezentendimentu pesoal entre sidadaun idak-idak no grupu ida-idak.”
Jornalista : Chay Risky