Loluwari Média (Díli) – Xefe Estadu Maiór Forsa Defeza Timor-Leste (F-FDTL), Brigadeiru Generál, José da Costa Soares “Trix”, hatete, Matebian Alferes Armelindo da Cruz “Rede” hakotu nia jornada moris iha loron 23 Dezembru 2024 iha hospital Nasional Guido Valadares (HNGV), la’os halo funu mak mate kilat musan maibé mate tanba problema iha HNGV, tanba ne’e mak husu ba Ministra Saude (MS) bele hadia hospital ba futuru ho diak.
“Ita nia Alferes Armelindo da Cruz ne’e kuadru permanente ida iha Forsa Defeza Timor-Leste (F-FDTL), ne’ebé hahu halo rekrutamentu iha Aileu to’o ohin loron sai veteranus ba F-FDTL no ita nia Alferes nia dedikasaun iha Centru Instutisaun Komandante Nicolau Lobato Metinaro (CICNL), nu’udar Komunikasaun no servisu mos haree material ba Guerra nian.” Dehan Xefe Estadu Maiór F-FDTL, Brigadeiru Generál, José da Costa Soares “Trix”, ba jornalista sira, iha kuartel General Fatuhada Dili, kinta (26/12).
Trix esplika bainhira komandu hili Alferes ba Komunikasaun guerra nian, ne’e la’os ema babain maibé Alferes nu’udar kuadru permanente ida iha Instutisaun F-FDTL.
“Ami lakon ami nia ema diak ida tanba distinu iha Maromak nia liman ita hotu lakohi simu realidade ida ne’e maibé Maromak nia planu oin seluk mai ita nia hakarak.”
Instutisaun F-FDTL iha lei ne’ebé sei tau matan ba Inan faluk ho oan kiak na’in ne’en tanba lei ne’e permanente ona hodi haree ba Forsa Armada hotu.
“Ha’u nia membru tinan ida ne’e lakon vida hamutuk na’in 11 husi HNGV ne’e realidade tanba ne’e mak husu ba Ministra saude tanba saida mak ita tenke lakon ita nia ema no kondisaun saúda mak ita enfrenta tanba ami nia membru la’os ba halo funu mak mate iha batalla maibé ita nia funu laiha maibé ita funu fali hospital iha tempu ida agora.”
Bainhira membru F-FDTL ne’ebé moras ba hospital nusa mak la haruka ba rai liur maibé tenke lakon nia vida tanba ema mate ne’e serteza maibé husu ba Ministra Saude atu tau konsiderasaun ba HNGV nia fasilidade ne’ebé ladiak. Karik bele hadia iha tempu tu’ir mai bainhira kondisaun HNGV iha maibé ladun diak karik Instituisaun relevante bele hadia ne’e mak importante.”
Saudozu Alferes Armelindo da Cruz “Rede” moris iha Soibada iha 25 Fevereiru 1969. Saudozu Alferes nu’udar oan husi Mateus da Cruz (matebian) ho Inan Claudina da Costa (Matebian). Saudozu Alferes, Armelindo, husik hela nia kaben Edia Fernandes ho oan kiak na’in 6.
Saudozu transforma husi Falintil ba Falintil-Forsa Defeza Timor-Leste (F-FDTL) iha 02 Fevereiru 2001, Saudozu koloka iha primeiru Batelaun iha kompaña C nu’udar soldadu, iha 23 Jullu 2003.
Saudozu koloka mai fali FCU Metinaro, iha 13 Dezembru 2003 promove ba Furiel, iha 17 Dezembru 2005, no saudozu koloka fali ba kuartel General iha Diresaun Komunikasaun iha 23 Jullu 2007, iha 11 dezembru 2016, saudozu hetan promosaun ba segundu Sargentu. Saudozu promovidu ba primeiru Sargentu iha 13 April 2023, Saudozu koloka fali iha Unidade Apoiu Kuartel General seksaun Armagen iha 13 April 2024 no promove ba Alferes nu’udar Xefe seksaun Armagen.
Saudozu Alferes Armelindo, nia dedikasaun ba Instutisaun F-FDTL durante tinan 23 nia laran no Saudozu hala’o buat barak nu’udar servisu militár nomos partisipa iha treinamentu no kursu Instutisaun haruka.
Jornalista : Chay Risky