Loluwari Média (Dili) – Adidu Defeza Forsa Australia ba Timor-Leste, Kapitaun Mar e Guerra, Matthew Richardson, hatete, governu Australia entrega edifisiu Paiol armamentu, ne’ebé ho kualidade edifisiu atu preserva sasan fasilidade militar Komponente Navál.
“Simboliza kooperasaun iha area militar Timor-Leste ho Australia metin liu tan. Tanba Timor-Leste ho Australia nia relasaun ne’e hahu kedas husi funu to’o ohin loron, tanba ne’e atu hametin parseiru kooperasaun ida ne’e liuhusi Forsa Defeza Australia apoiu tan Komponente Naval hodi konstrui edifisiu ida ba Komponente Naval tu’ir tempu ne’ebé determina.” Dehan Adidu Defeza Forsa Australia ba Timor-Leste, Kapitaun Mar e Guerra, Matthew Richardson ba jornalista sira, iha Komponente Navál Hera, Domingu (12/01).
Nia dehan Australia liuhusi Forsa Armada Australia ofisialmente entrega edifisiu Paiol armamentu ba Forsa Komponente Naval atu utliza hodi tau fasilidade militar.
“Edifisiu ida ne’e Australia kontinua hato’o ninia protidaun hodi apoia Timor-Leste iha area militár no area kooperasaun sira seluk.”
Paiol armamentu militar ne’e objetivu halo nu’udar armazen, ba Komponente Navál atu prezerva fasilidade militar hanesan kilat no munisioes inklui fasilidade armamentu sira seluk.
Paiol ne’e konstrui husi empreza RMS Australia iha Timor-Leste hahu inisial ninia konstrusaun iha 15 Abril tinan 2024 no termina iha 10 Janeiru 2025 no osan ba projetu konstrusaun Paeol armajenamentu ne’e ho kuantidade millaun 2 dolar amerikanu ($ 2.000.000.00), ne’ebé Finansia husi Forsa armada Australia.
Paiol armamentu militar ne’e kompleta ho fasilidade adekuadu ne’ebé bele kontrola fasilidade militar atu preserva iha laran.
Ministru Defeza (MD), Kontra Almirante Donaciano Costa Gomes “Pedro Klamar Fuik”, dehan Paiol armamentu ne’e importante atu militar sira bele prezerva sira nia fasilidade militar hanesan kilat, munisioes no kapasete da Gerra bainhira halo misaun ida.
“Obrigadu ba ita nia parseiru Australia ba imi nia diak tomak ne’ebé konstrui Paiol armamentu ba Forsa Naval. Fasilidade ne’ebé modernu no sufistikadu. Ha’u hanoin ita kontinua matein kooperasaun ho Australia no Indonesia inklui rai sira seluk.”
Jornalista : Chay Risky