Loluwari Média (Díli) – Komandante Munisípiu Díli (KMD), Superintendente Xefe Polísia, Orlando Gomes, hatete, Timoroan oan ida ne’ebé estraga Aioan ne’ebé kompaña kuda iha Jardim Aimutin, PNTL kaptura ona Suspeitu ho inisial AC.
“Hafoin ita rona informasaun komandu munisípiu Díli, orienta kedas eskuadra Dom Aleixo no servisu sekreta informasaun tun kedas ba fatin akontesimentu hodi buka tu’ir suspeitu no ita kaptura kedas.” Dehan Komandante munisípiu Díli (KMD), Superintendente Xefe Polísia, Orlando Gomes, ba jornalista sira, iha eskuadra Dom Aleixo, Aimutin Dili, Sexta (11/07).
Gomes esplika, Suspeitu PNTL liuhusi Eskuadra Dom Aleixo no Servisu Sekreta Informasaun kaptura hodi mai halo identifikasaun no sei halo prosesu ba Ministériu Públiku (MP).
“Informasaun ne’ebé ita rekolla katak sidadaun ne’e moras mental maibé prosesu ami halo hotu ona no ami sei entrega ba parte Saúde nian liliu Doutor sira atu bele haree nia kondisaun nia moras mental duni ka la’e ita hein.”
Jardim ne’ebé iha postu penal Aimutin ne’e kompaña kria no kuda Ai oan hamutuk 15 inklui Aifunan atu hafurak sidade Dili maibé suspeitu AC, estraga no koa hotu nia tahan no hun.
“Suspeitu AC ne’ebé ita kaptura mai halo identifikasaun ho entrega ba Ministeriu Públiku hodi halo prosesu tu’ir lei ne’ebé iha, tanba aktu ne’ebé ita nia sidadaun komete ne’e ita konsidera krime, tanba tu’ir loloos ita hotu tenke proteze ita nia Jardim sira iha kapital Dili. Tanba ne’e ami husu ba xefe aldeia no xefe suku sira inklui konsellu polisiamentu komunitariu (KPK), atu toma responsabilidade ba komunidade sira atu kuidadu no asegura ita nia jardim sira iha kapital Dili.”
“PNTL forma KPK iha suku 33 iha hotu ona ne’ebé durante sira hala’o sira nia funsaun no sira sempre servisu hamutuk ho ofisiál polísia suku (OPS) no mos autoridade lokal sira hodi halo monitorizasaun ba sira nia bairro sira ne’ebé sira destaka ba.
Jornalista : Chay Risky