Loluwari Média (Díli) – Xefe Estadu Maiór Jenerál Forsa Defeza Timor-Leste (F-FDTL), Tenente Jenerál, Domingos Raul “Falur Rate Laek”, hatete, ohin Forsa Defeza Timor-Leste (F-FDTL) dahuluk hala’o Exersisiu Kombinasaun Armas, ida ne’e nu’udar atividade krusial ida ne’ebé atu hasai imi nia kapasidade Operasionál hodi hasoru anin fuik no laloran siak, ne’ebé sei mai, F-FDTL prontu hasoru iha futuru.
“Konseitu kombinasaun Armas ne’e fundamntal ba ita nia treatmentu Militár tanba ne’e liuhusi Exersisiu ida ne’e imi sei hadia imi nia efikasia iha situasaun kombate no aumenta imi nia protidaun no respeita ba kualkér dezafiu ne’ebé ita hasoru oin mai.” Dehan Xefe Estadu Maiór Jenerál F-FDTL, Tenente Jenerál, Domingos Raul “Falur Rate Laek” ba jornalista sira iha Komponente Naval Hera, Segunda (14/07).
Falur hatete, exersisiu sira ne’e ho senariu pratika ho kolaborasaun hodi hadia imi nia abilidade ba oin ne’e importante tebes, tanba imi hotu nafatin aprende ba malu no troka ba malu.
“Ha’u agradese ba esforsu hotu no inisiativa ne’ebé imi dezenvolve ba Instituisaun F-FDTL hahu inisiu no to’o ohin loron. Ha’u husu ba imi, imi nia kompromisu no misaun Defeza ne’ebé imi kontribui ba ita nia soberania tanba ba futuru ameansa no dezafiu sira sei iha, tanba ne’e imi tenke treinamentu kosntante no formasaun no Rekursu humanu ne’e importante.”
Determinante mak elementu humanu tanba ne’e imi nia formulasaun importante hanesan Exersisiu dahuluk ne’ebé Instituisaun F-FDTL hala’o tanba ne’e Instituisaun F-FDTL prontu hasoru anin fuik no laloran siak ne’ebé sei mai F-FDTL Prontu hasoru.
“Ha’u husu ba komponente hotu-hotu no mos Unidade hothotu imi hadia imi nia kapasidade de kombate liuhusi treatmentu maibé imi mos tenke hadia imi nia komportamentu pesoal atu ita bele responde ba ameasa oi-oin ne’ebé ohin loron akontese no ba futuru bainhira ema nasaun ruma hanoin at karik kuidadu Asu siak iha Timor-Leste.”
Komandante Komponente Naval Komodoru, Higino das Neves, hatete, Exersisiu Kombinasaun Armas dahuluk F-FDTL hala’o husi Komponente tolu (3) mak Komponente Naval, Komponente Aeria Ligeira no Komponente Terestre inklui Unidade Polísia Militár (PM) no Unidade Falintil (UF).
“Ita nia forsa ki’ik maibé ita presiza forsa ida ne’e tenke hatene atu servisu hamutuk, tanba Exersisiu Kombinasaun Armas ne’e Exersisiu Operasionál. Tanba ne’e mak Exersisiu ne’e sei iha tiru atu nune’e sira bele fahe esperiénsia no kuñesimentu ba malu atu ba futuru Komandante pelotaun iha ona kapasidade atu fo ordem ba membru sira atu sira bele exekuta no servisu hamutuk.”
Objetivu prinsipál Exersisiu Kombinasaun Armas ne’e atu servisu hamutuk tiru armas iha terenu tanba ne’e komandu husu atu utiliza tempu ho diak ho imi bele hala’o buat ne’ebé imi nia instrutor hanorin iha terenu.
“Ha’u husu ba imi atu tau imi nia neon ba imi nia Komandante sira ho imi nia neon fiar malu hatudu imi nia disipliña nune’e iha situasaun difisil saida mak imi halo nune’e futuru ita iha ona preparasaun atu hasoru dezafiu anin fuik no laloran siak ita prontu ona atu hasoru iha kualker tempu no oras.”
Jornalista : Chay Risky