Loluwari Média (Díli) – Diretór Diresaun Investigasaun Kriminál Nasionál (DIKN), Superintendente Polísia, João Belo dos Reis, informa, iha segunda Diresaun Investigasaun Kriminál simu keisa husi timor oan ne’ebé sente ofendidu, tanba transazaun iha online ne’ebé autor husi Estranjeiru sira lansa.
“Horseik Investigasaun Kriminál Nasionál lidera husi Inspetór Xefe Polísia, Aquiles Dias, halo operasaun treaking no infiltra ba transazaun online, ita konsege detekta no ami konsege detein, kazal ida ho sidadaun Timor ne’ebé fasilita husi Estranjeiru hodi habosok ita nia komunidade iha Timor-Leste.” Dehan Diretór DIKN, Superintendente Polísia, João Belo dos Reis, ba jornalista sira, iha Komandu Jerál PNTL, Kaikoli, Dili, kuarta (16/07).
Belo, esplika, detensaun ne’e realiza bazeia ba faktus ne’ebé iha tu’ir rekejitu ne’ebé atividade Seguransa Polísia Nasionál Timor-Leste (PNTL) halo.
“Ami detekta suspeitu sira lansa propaganda falsu iha Média Sosial ho maneira publikasaun sasan baratu iha media-sosial mak kareta, Motor, Telefone, Osan Mean no seluk tan.”
“Propaganda sira ne’e atrai tebes komunidade sira hodi sira manda osan ba suspeitu ne’ebé hela iha estranjeiru. Tanba modus operandu ida ne’e sira uza mos ba sidadaun kazal Timor oan ida no kazal Timor oan fasilita informasaun no rekolla informasaun inklui lansa Informasaun atrai timor oan sira.
“Horseik ami asegura mos suspeitu ou agen ne’ebé iha Timor ho suspeitu estranjeiru nian halo falsifikasaun dokumentu (Livrete) ne’ebé ho faktus ne’e atrai tebes ita nia sidadaun sira iha Timor-Leste.”
Maneira seluk ne’ebé suspeitu sira lansa mak kareta sira ne’ebé ema faan sira rekolla no habosok ba fali sidadaun Timor oan sira dehan kareta sidadaun sira bele foti ho folin baratu de’it, tanba ne’e mak PNTL husu ba publiku sira atu halo transazaun karik tenke hatene loloos fornesedor sira ne’ebé imi hakarak hola tenke hatene mos nia legalidade.
“Ha’u husu ba sidadaun sira, tenke hatene loloos mak haruka osan atu hola kareta sira atu nune’e imi labele sai vitima ba transazaun online illegal sira, tanba ne’e mak PNTL hamutuk ho autoridade seluk inklui jornalista sira atu eduka nafatin ita nia komunidade sira, atu hatene krime online sira hotu, atu labele sai vitima ba transazaun ne’ebé oras ne’e espalla iha Média Sosial.”
Tanba aktu ne’ebé sidadaun Timor kazal halo ne’e krime. Krime ba falsifika no krime ba burla tanba ne’e mak PNTL Detein suspeitu kazal ho Inisiál TDS iha sela detensaun. Nia argumenta.
Jornalista : Chay Risky