Loluwari Média (Díli) –Komandante Operasaun Polísia Nasionál Timor-Leste (PNTL), Superintendente Xefe Polísia, Justino Menezes, informa, ohin Unidade Espesiál Polísia (UEP), Komandu Jerál, Komandu Munisípiu Díli (KMD) no mos Diresaun Tranzitu Seguransa Rodaviariu mai iha Estadiu Munisípal Dili atu fo kuñesimentu ba area servisu atu fo seguransa ba VIP no adeptus sira ba jogu Comunidade Países Lingua Portuguesa (CPLP).
“Ohin ami mai iha ne’e atu fo kuñesimentu ba deskrisaun servisu liliu ba servisu Operasionál nian, tanba PNTL lihusi UEP, Komandu Jerál, KMD no Diresaun Tranzitu nian atu fo seguransa maximu ba eventu jogu CPLP ida nee.” Dehan Komandante Operasaun Polísia Nasionál Timor-Leste (PNTL), Superintendente Xefe Polísia, Justino Menezes, ba jornalista sira, iha Estadiu Munisípal Dili, kinta (17/07).
Menezes hatete, PNTL sei fo seguransa ba Jogu CPLP ho métodu tolu, métodu primeiru seguransa mais proximu segundu seguransa proximu no terseiru mak Seguransa forxada.
Tanba ne’e mak Autoridade seguransa husu ba adeptus sira bainhira tama Estadiu, karik tama ho disipliña no tu’ir regras ne’ebé komisaun prepara ona maske tama ho gratuita maibé bainhira ita nia tribun nakonu ona ita labele obriga atu tama, ne’e autoridade seguransa sei la fo fatin ona.
“PNTL sei fo seguransa maximu ba Delegasaun nasaun CPLP ne’ebé sei tu’ir kompetisaun internasionál ida ne’e ho diak to’o remata.
“Ami garantia atu fo seguransa maximu ba jogu CPLP se bainhira grupu ou ema individu balu hakarak atu halo asaun negativu hodi hafoer imajen Timor-Leste, ami sei la tolera kualkér se de’it.”
PNTL iha liña koordenasaun ho Forsa Defeza Timor-Leste(F-FDTL), bainhira situasaun ruma la permite mak Forsa Amiga, F-FDTL sei reforsa PNTL hodi halo atuasaun ba kriminozu sira ne’ebé tenta atu halo asaun tanba PNTL ho F-FDTL iha operasaun periodiku 24 oras nia laran.
“Ami husu ba sidadaun Timoroan sira hotu, hakarak atu mai partisipa jogu CPLP ne’e mai ho disipliña tu’ir regras ne’ebé Komisaun CPLP no Autoridade seguransa PNTL tau ona, no lao tuir ida ne’e atu nune’e buat hotu bele lao diak.”
Jornalista : Chay Risky