Loluwari Média (Díli) – Reprezentante Komandante Jerál Komandante Administrasaun Polísia Nasionál Timor-Leste (PNTL), Superintendente Xefe Polísia, Natercia Eufrazia Martins, hatete, Komandu ensera Treinamentu Expolisive Ordenance Disposal (EOD) ou expluzivu nian bainhira detekta sasan explozivu ka material funu ne’ebé sei iha munisípiu.
“Ita nia membru PNTL husi Unidade Espesiál Polísia (UEP) na’in neen (6) ne’ebé ohin termina treinamentu EOD liliu ba sasan expluzivu ne’ebé sei soe lemo-lemo iha munisípiu sira hotu.” Dehan, Reprezentante Komandante Jerál, Komandante Administrasaun Polísia Nasionál Timor-Leste (PNTL), Superintendente Xefe Polísia, Natercia Eufrazia Martins, ba jornalista sira, iha Komandu UEP Bairo-Pite, Díli, kuarta (30/07).
Superior ne’e explika, Timor-Leste ukun an ho funu nune’e sasan guerra nian barak mak sei soe lemo-lemo iha munisípiu sira hotu. Tanba ne’e mak Forsa Armada EUA nian mai fo treinamentu ba membru UEP na’in 6 hodi bele halo destruisaun ba sasan Expluzivu sira ne’ebé sei iha.
“Ohin ita nia membru UEP na’in neen ensera treinamentu EOD husi formador EUA nian no durante treatmentu EOD nian ba fulan ida nia laran. Ita nia membru sira pratika barak ba ekipamentus EOD nian ne’ebé oferese husi Forsa Marinha hodi halo destruisaun ba Sasan Expluzivu sira.”
“Membru PNTL husi Unidade Espesiál Polísia (UEP) hamutuk na’in 6 ne’ebé tu’ir treinamentu EOD nian durante fulan ida no membru sira ne’e tuir treinamentu EOD iha nivel ida no ohin to’o ona nivel 3 nian tanba material funu nian barak mak sei namkari iha Timor laran tomak tanba ne’e autoridade seguransa (PNTL) husu ba komunidade sira hotu bainhira halo to’os ou hetan material funu karik informa ba PNTL no keta sunu rai besik ba material funu nian tanba perigu ba imi nia vida.
Komandante Unidade Espesiál Polísia (UEP), Superintendente Polísia, Damião Correia agradese ba formador sira husi Forsa Marinha ne’ebé oferese nia tempu hodi fo formasaun ka treinamentu ba membru UEP na’in ne’ebé ohin termina sira nia treatmentu EOD nian durante fulan ho diak.
“Ohin ita ensera treinamentu EOD husi Formador EUA ne’ebé durante fulan ida nia laran akompaña no fo pratika ba ita nia membru UEP na’in neen (6) ne’ebé ohin ita ensera ne’e sai nu’udar bukae ida atu ita nia membru na’in neen bele utiliza Esperiénsia ne’ebé sira hetan iha terenu tanba sira nia treinamentu iha nivel 1 ate nivel 3.”
Membru na’in ne’ebé tu’ir treinamentu EOD durante fulan ida nia laran sira aprende no pratika direita ba Eskluziva Bom no kanau ne’ebé soe lekar iha munisípiu 13 inklui Rejiaun Administrativa Espesial Oe-Cusse Ambeno (RAEOA), sira pratika halo destruisaun ba Bom antigu sira ne’ebé sei iha ailaran atu nune’e labele fo perigu ba komunidade sira nia vida.
Formadór Marinha Estadus Unidus America (EUA), Kyle Slowic, hatete, treinamentu EOD ohin termina ona Espesiál ba membru UEP na’in ne’ebé ohin termina ba nivel 3 ne’e membru ida ne’ebé brani tebes no iha kuñesimentu ne’ebé diak ba fulan ida nia laran.
“Ohin loron importante ne’ebé ita ensera ita nia treinamentu EOD durante fulan ida nia laran. Sira iha esperiénsia ne’ebé bo’ot no todan ida ne’ebé bo’ot iha imi nia kabas. Maibé ha’u nia konfiansa tomak ba imi katak imi sei halo buat ne’ebé bo’ot liu iha tempu tu’ir mai no ha’u nia parabéns no bom susesu ba imi hotu.”
Jornalista : Chay Risky