Loluwari Média (Díli) – Aniversariu loron istóriku Forças Armadas de Libertação Nacional de Timor-Leste (FALINTIL), ba dala 50, Prezidente Repúblika (PR), José Ramos-Horta, kondekora titulu póstumu ho onra aas liu nasaun nian ba Heroi Na’in Haat ne’ebé luta ba independénsia Timor-Leste nian, iha Serimónia solene ne’ebé hala’o iha Tasi-Tolu.
Tu’ir Dekretu Prezidente Repúblika Numeru 82/2025, ne’ebé asina iha 19 Agostu 2025, iha Palásiu Prezidensiál Nicolau Lobato, Prezidente Ramos-Horta, kondekora titulu póstumu ho Grande Kolar Orden Timor-Leste, ba Saúdozu Prezidente Nicolau dos Reis Lobato “Tau Fui”
Alende ne’e, tuir Dekretu Prezidente Repúblika Numeru 83/2025, ne’ebé asina mós iha 19 Agostu, Prezidente Ramos-Horta, kondekora titlu póstumu ho Grau Kolar Orden Timor-Leste, ba Kombatente Libertasaun Nasionál na’in tolu ne’ebé respeitadu:
- Joaquim Saldanha “Naha Berek”
- Artur do Nascimento “Tripas”
- Dulce Cruz “Wewe Sahe”
“Ohin, iha aniversáriu FALINTIL nian ba dala 50, ita fó onra ba mandatu konstitusionál hodi rekuñese lideransa supremu Prezidente Nicolau Lobato nian no korajen imensu husi eroi sira hanesan Joaquim Saldanha, Artur do Nascimento, no Dulce Cruz.
Sira nia legadu mak livre no soberanu Timor-Leste, ne’ebé ita moris iha ohin loron.” Dehan Prezidente Repúblika (PR), José Ramos-Horta, nia diskursu iha ambitu selebrasaun aniversariu Ezistensia Falintil ba dala 50 iha Tasi tolu Dili, kuarta (20/08).
Serimónia ida-ne’e marka pasu signifikativu ida iha kompromisiu Estadu nian hodi fó onra ba pesoal hotu-hotu ne’ebé dedika sira nia moris ba independénsia Repúblika Demokrátika Timor-Leste (RDTL).
Jornalista : Chay Risky