Loluwari Média (Díli) – Membru Falintil Forsa Defeza Timor-Leste (F-FDTL) husi komponente Naval na’in rua “katik” sai husi Militar ba vida sivil tanba komete hahalok “selingkuh” iha instituisaun laran.
Komandante Komponente Naval, Comodoru, Higino das Neves informa, F-FDTL la permite no lakohi entre membru sira iha institusaun laran atu se kilat ba malu.
“Sira na’in rua fo kanek ba Instituisaun no família tanba ne’e mak Xefe Estadu Maiór Jenerál F-FDTL hasai despaixu hodi hasai membru F-FDTL na’in rua, Sub-Tenente no Gurmete (soldadu feto) tanba komete Adulteiro (selingkuh)” Dehan Komandante Komponente Naval, Comodoru, Higino das Neves, ba jornalista sira iha Komponente Naval Hera, Segunda (01/09).
Nia dehan, kazu ne’e akontese desde iha tinan kotuk bainhira Sub-Tenente ho soldadu feto ne’e ba tu’ir formasaun iha Austrália.
“Sira iha Australia envesde sira fokus eskola, (maibé) sira estraga imajen forsa nian, entaun envesde sira na’in rua mak hatene mais sira grava fali iha HP (telemovel)” dehan nia.
Higino hatutan, soladadu feto nia laen ne’ebé mós nu’udar F-FDTL hetan imajen ne’e halo situasaun sai grave no keixa kedas ba komandante atu foti medida tu’ir lei.
Maibé iha Investigasaun dahuluk, Sub-Tenente ne’e la ko’alia ho onestu ba superior, no halo ezemplu ne’ebé la di’ak ba nia fen kaben, inklui hamonu imagen Instituisaun F-FDTL nian iha publiku.
Pratika aktu bosok nia Komandante iha primeiru Investigasaun ne’e halo manobra no buka haburas solidaridade no Kamaradazen entre Militár sira no kria ambiente la saudavel iha institusaun.
Membru soldadu feto mós ne’e iha primeiru Investigasaun nega la halo no segundu Investigasaun mak hafoin reklama.
Situasaun ne’e Komandante Higino triste tanba hamenus rekursu ema bainhira Militár sai husi instituisaun hanesan família bo’ot ne’ebé hari’i ho kosar no terus hamutuk.
“Maibé ita tenke husik sira la’os tanba ita mak la hadomi sira maibé sira na’in rua mak la hadomi ita.” dehan nia.
Neves esplika, Sub-Tenente ne’e fo kanek ba nia fen ho nia oan no Gurmete (feto) fo kanek ba nia laen tanba Gurmete nia laen mos iha Forsa Armada.
“Ho ida ne’e mak sira na’in rua estraga ambiente Forsa Armada liliu Komponente Naval ne’ebé hari’i ho Sakrifísiu, Tan de’it sira na’in rua nia hahalok fo kanek ba malu loron ruma membru sira bele se kilat ba malu” dehan nia.
Husu ba Forsa sira hotu, Nia dehan, Sub-Tenente halo ne’e kontra nia dever ho obrigasaun no babain hasai membru ho separasaun servisu agora tenke halo mudansa bainhira membru ne’ebé hahalok komete kontra lei.
“Ohin loron ita servisu hamutuk atu kuidadu ho dignidade família Komponente Naval nian ne’ebé hari’i mai husi Falintil ne’ebé trasa mai husi povu maubere-oan” dehan nia.
Komandante husu ba membru sira atu hanoin servisu bainhira membru ne’ebé ho intensaun atu hamonu ka estraga imagen Instituisaun F-FDTL nian no haterus ema seluk nia uma kain F-FDTL la permite no la tolera tenke hasai husi F-FDTL.
“Ha’u hanesan Komandante Komponente ha’u hadomi imi hotu maibé membru sira tenke kria ambiente ne’ebé di’ak labele kria ambiente ne’ebé halo ita nia Instituisaun F-FDTL la gosta malu ne’e ladiak”. dehan nia.
Enkuantu Bazeia Despaixu husi Xefe Estadu Maiór Jenerál (F-FDTL), Tenente Jenerál, Domingos Raul “Falur Rate Laek” iha 01 Agustu 2025 ho Nim 2020981110 ba Sub-Tenente inisial (SRC) no Nim 28671412 ba Gurmete inisial SX ne’ebé viola Regulamentu Disipliñar F-FDTL iha artigu 04 numeru 02.
Jornalista : Chay Risky