Loluwari Média (Díli) – Portavoz Forsa Humanista Timor-Leste (FHTL), Micaela de Jesus Amaral, fo ultimadu ba parlamentu nasionál atu dada hikas osan referidu, atu halo investimentu ba setór save sira, hodi lori povu ba moris dignu no prosperu. Ho razaun ne’e FHTL prontu tun batalla halo manifestasaun no simu risku atu defende povu hasoru Deputadu sira iha loron 15.
“FHTL konsidera parlamentu nasionál halo violasaun ba prinsipiu ukun rasik an, no trai komprimisiu eleitoral no viola povu nia direitu konstitusionál. Tanba desizaun ne’ebé parlamentu foti la reprezenta povu nia lian.” Dehan Portavoz Forsa Humanista Timor-Leste (FHTL), Micaela de Jesus Amaral, ba jornalista sira iha Santa Cruz, Kintal Bo’ot, Dili, sexta (12/09).
Portavos segundu FHTL, Jeto Oliveira, akresenta FHTL nia pozisaun klaru atu kontra injustisa iha Timor-Leste.
“Iha kontextu ba sosa prado tinan ne’e, ne’ebé tama ona iha aprovasaun, FHTL nafatin hamutuk ho kamada sosiaedade sira hotu, liu husi forma oi-oin atu revolta desizaun parlamentu nasionál, ne’ebé foti la ho rasionál.”
Tuir Jeto, PN halo traisaun ba direitu eleitoral, tanba tempu agora la nesesariu ba deputadu sira atu sosa kareta foun, tanba povu maioria sei moris kiak no joven barak dezempregu.
Kona-ba saida mak FHTL sei halo bainhira PN mantein desizaun sosa kareta, portavos, El Maubere informa, karik kontinua sosa kareta sira sei la’o ho opsaun rua de’it. Primeiru kareta ne’ebé sosa oferese fali ba instituisaun ne’ebé presiza, segundu mak tenke faan fila fali kareta refereidu hodi responde ba problema sosial sira seluk.
“Timor-Leste (FHTL), reafirma sira nia pozisaun hodi kontra desizaun politika PN atu sosa kareta unidade 65 ba deputadu sira, no prontu tun iha batalla hodi revolta kontra PN.”
“Ho deputadu sira nia razaun hirak ne’e, FHTL lamenta tebes no diskorda total, politika PN atu sosa kareta luxu ou prado ba deputadu 65. Tanba ita haree no observa politika sosa kareta prado ba deputadu sira laos foin primeira vez, maibé sai ona kultura ba sira hahu husi primeira legislatura to’o sesta lesilatura.”
“Kada periodu governasaun troka malu, maibe deputadu sira la’os ona reprezenta povu hodi ko’alia destinu moris povu nian, maibé reprezenta de’it sira nia partidu no grupu iha uma fukun PN”.
FHTL konsidera deputadu sira la iha ona seriedade atu diskute problema sosial sira hanesan, aimoruk laiha, eskola barak menus profesor, infra-estrutura hanesan estrada, bee moos, no eletrisidade nafatin sai peokupasaun ba povu iha area rural.
“Maibé uma fukun PN sai fali fatin ba istori malu, dun malu, konta istoria, no aat liu tan deputadu sira uza PN sai nu’udar fatin GMT hodi tawar malu no hatudu premanizmu ba malu.”
Tanba ne’e FHTL husu estudante universitariu hotu, sosiedade sivil, veteranus sira hotu, atu hamri’ik kontra desizaun injustu ne’ebé fo benefisiu de’it ba deputadu sira no ba sira nia família.
“Maske PNTL bandu atu estudante sira hato’o aspirasaun, maibé ami kompremetidu nafatin halo, tanba ne’e loron 15, hakarak ka lakohi estudante universitariu hamutuk ho sosiedade sivil tun halo demostrasaun,”
“Prontu atu simu konsekuensia saida mak mosu, sira prontu atu simu, tanba ida ne’e nu’udar luta ba libertasaun povu lian laek sira.
Jornalista : Chay Risky