Loluwari Média (Aileu) – Estudante universitariu Seloi-Oan hamutuk Autoridade lokal diskorda ba Parlamentu Nasional (PN), atu sosa prado, maibé povu suku Seloi-Kraik no Seloi Malere, sai vitima ba estrada durante tinan (6) abandona.
Tu’ir porta-voz estudante universitariu Seloi-oan, Asis Pinheiro, estudante sira hamutuk autoridade lokal suku Seloi-Kraik ezije ministeriu obras publikas (MOP) hodi haree kompaña sira ne’ebé halo rehabilitasaun estrada haleu lagoa Seloi, durante tinan (6) ona, maibé la dauk finaliza, estrada refere abandona.
“Haree ba realidade infra-estrutura iha suku Seloi-kraik, liliu iha area infra-estrutura baziku, estrada ne’ebé hetan rehabilitasaun husi kompaña CAVIQ UNIP, LDA, IN JV WITH SUNNINES UNIP, LDA, LNG UNIP LDA, SAKSAUR UNIP LDA no MORTILES, ne’ebé mak abandona sira nia servisu to’o agora.” Dehan Portavoz Estudante Universitariu Seloi-oan, Asis Pinheiro ba loluwari.tl iha Seloi-kraik, Segunda (15/09).
Pinheiro hatete, bazeia ba observasaun no informasaun husi konsellu suku Seloi-kraik no Seloi Malere, kona-ba rehabilitasaun estrada haleu lagoa Seloi, iha ne’eba halo besik tinan 6 ona husi kompaña kontrator sira, maibé la dauk finaliza no sai abandonadu ba projetu refere to’o ohin loron.
“Caviq Unip Lda, in Jv With Sunniness Unip Lda, Lng Unip Lda, iha ne’eba data hahu 22 Janeiru 2020, no remata iha 21 Janeiru 2021, ho orsamentu ba estrada refere hamutuk $717,064. 23, (rihun atus hitu sanulu resin hitu, dolar neenulu resin ha’at, sentavus ruanulu resin tolu), kaer ponte no bedakan to’o agora seidauk finaliza no sai abandonadu ba projetu refere no hetan kontinuasaun husi kompaña LNG Unip Lda no Mortiles maibé to’o agora seidauk finaliza, husi kontrator sira ne’e hetan fiar husi MOP hodi halo rehabilitasaun ba estrada suku Seloi-Kraik no Seloi Malere, to’o agora komunidade suku rua seidauk sente benefisiu husi projetu refere.”
Projetu refere tinan 6 ona, maibé kompaña sei deve traballador sira nia osan to’o agora ladauk selu, nune’e mós kompaña sira nia fatin iha terenu mamuk no iha de’it mak traballador sira husi kompaña Chaviq unip Lda. Husi preokupasaun komunidade sira nian laiha Deputadu/a ka Ministeriu kompatente sira atu ba fatin refere halo fiskalizasaun hodi haree problema refere.
Maibé sira kanta iha Parlamentu Nasional dehan sosa prado atu utiliza ba halo fiskalizasaun ne’e sira bosok.
“Problema ne’ebé tu’ir situasaun realidade komunidade suku Seloi infrenta oras ne’e mak kompaña balu to’o agora seidauk selu traballador sira nia salariu, saluran sira laiha kualidade, tanba ne’e kee hela, maibé seidauk finaliza”.
“Tempu udan bee intupidu fó impaktu ba komunidade sira nia natar, alende estrada sira ne’ebé ateru ho rai mean difikulta movimentu transporte iha tempu udan. No mós laiha fiskalizasaun husi deputadu/a sira durante projetu hahu to’o agora maibé sira kanta tenke sosa kareta moe laiha.”
Husu kompaña sira ne’ebé mak kaer projetu iha Seloi-kraik, tenke aselera servisu ne’ebé mak seidauk finaliza. Tanba haree ba kondisaun klima mudansa tebes, bele afeta komunidade sira iha tempu bailoron rai rahun no tempu udan bele afeta ba dezastre naturais sira.
Husu mós autoridade munisipiu, liliu Diretór obras publiku munisipiu Aileu, atu halo monitorizasaun no tau atensaun seriu ba estrada ne’ebé mak hetan rehabilitasaun husi kompaña sira ne’ebé mak sira temi iha leten.
Jornalista : Nandes