Loluwari Média (Díli) – Governu Timor-Leste kontinua hametin koordenasaun entre ministériu, instituisaun nasionál no ekipa téknika sira atu asegura preparasaun ba Prezidénsia ASEAN 2029 la’o ho di’ak, inklui dezenvolvimentu infra-estrutura, alojamentu, hotel, aeroportu no fasilidade seluk atu suporta enkontru rejionál inklui simu delegasaun internasionál.
Objetivu gusi enkontru ne’e atu asegura ministériu no instituisaun Estadu sira prepara ho di’ak, hodi organiza enkontru rejionál no simu delegasaun internasionál bainhira Timor-Leste asume Prezidénsia ASEAN iha 2029.
Ministru Negósiu Estranjeiru no Kooperasaun, Bendito Freitas, hatete, adezaun Timor-Leste ba ASEAN loke dalan ba oportunidade foun iha kooperasaun ekonómika, integrasaun rejionál no hametin relasaun ho nasaun membru sira no parseiru diálogu.
Governante ne’e afirma, preparasaun ba Prezidénsia ASEAN presiza koordenasaun metin entre ministériu, instituisaun relevante no ekipa téknika, atu nune’e atividade hotu bele hala’o tuir planu no responde ba nesesidade organizasaun.
Iha enkontru ne’e, Vice-Primeiru-Ministru ba Asuntu Ekonómiku, Francisco Kalbuadi Lay, aprezenta informasaun kona-ba preparasaun infra-estrutura, inklui alojamentu, hotel, aeroportu no fasilidade seluk ne’ebé sei suporta atividade ASEAN no simu delegasaun internasionál.
“Preparasaun ne’e hala’o liuhusi Komisaun Nasionál 5, subkomité 14 no ekipa téknika sira, ne’ebé iha responsabilidade atu koordena aspetu operasionál, programa no nesesidade organizasionál ba enkontru ASEAN iha Timor-Leste” dehan nia ba jornalistasira iha salaun MNEK, Praja doa Coqueiros Dili, Segunda (26/10) .
PM Xanana Gusmão, nu’udar lideransa Komisaun Nasionál ba Preparasaun Prezidénsia ASEAN 2029, enfatiza katak, servisu hamutuk entre instituisaun sira importante tebes atu asegura preparasaun ne’ebé koordenada, efetiva no tuir padraun internasionál.
Iha parte seluk, Vice-Ministra Asuntu ASEAN, Milena Rangel informa, Komisaun Nasionál kontinua hala’o enkontru regulár atu haree progresu servisu no atualiza preparasaun husi komité no setór relevante sira.
Milena esplika, enkontru sira-ne’e permite komisaun monitoriza implementasaun desizaun sira ne’ebé foti ona, no asegura katak entidade responsável sira kumpre tarefa tuir kalendáriu preparasaun.
Milena Rangel mós dehan katak, dezenvolvimentu infra-estrutura, inklui konstrusaun sentru konvensaun (Convention Center) no preparasaun hotel sira, sai parte importante husi esforsu atu disponibiliza fasilidade adekuada ba delegasaun no partisipante internasionál.
Nia hato’o katak, komité no setór relevante sira presiza kontinua avalia servisu ne’ebé realiza ona, identifika tarefa ne’ebé seidauk kompleta no hametin koordenasaun atu asegura preparasaun la’o tuir planu no objetivu ne’ebé determina ona.
Jornalista: Ercia Freitas
Editór : Herminio Cardoso