Loluwari Média (Díli) – Komisaun Nasionál de Eleições (CNE) ohin hala’o enkontru ho delegasaun husi Uniaun Europeia (UE) atu fahe informasaun kona-ba preparasaun ba eleisaun prezidensiál 2027 no eleisaun munisipál ne’ebé sei hala’o iha tinan oin mai.
Vise-Prezidente Komisaun Nasionál Eleisaun (CNE), Pedro dos Santos hatete, Iha enkontru ne’e, delegasaun UE husu informasaun kona-ba preparasaun no prosesu konvite ba observadór internasionál. CNE esplika katak observadór ne’ebé sei konvida la’ós de’it husi Uniaun Europeia, maibé inklui mós nasaun sira husi Ázia, Rúsia no Comunidade dos Países de Língua Portuguesa (CPLP).
“CNE hateten katak to’o agora, data ofisiál eleisaun seidauk formalmente anunsia husi Prezidente Repúblika. Bainhira data eleisaun sai ona, autoridade kompetente sira bele fó informasaun ba públiku no hahú prosesu konvite ba observadór internasionál atu mai observa prosesu eleisaun iha Timor-Leste”dehan nia hafoin halo enkontru ho observadórsira iha CNE kuarta(21/10).
Kona-ba kustu ba observadór internasionál, CNE hateten, entidade sira ne’ebé mai observa mak responsavel ba sira-nia despeza rasik, enkuantu CNE sei prepara fatin no hahán ba sira.
“Iha preparasaun ba prosesu eleisaun, partidu polítiku hamutuk 17 mak rejista, inklui partidu foun no partidu sira ne’ebé rejistu ona antes. Enkuantu ne’e, ofisiál monitorizasaun sira mós kontinua halo preparasaun ba prosesu eleisaun”nia informa.
CNE mós sei halo sosializasaun kona-ba baze legal ne’ebé hakerek ona iha lei, atu asegura katak parte hotu-hotu komprende no kumpre regra sira ne’ebé aplika. Liuhusi sosializasaun ne’e, CNE hakarak identifika difikuldade sira, inklui kestaun finanseira no rekursu, no buka solusaun hamutuk ho instituisaun relevante sira.
CNE subliña katak preparasaun agora foka ba eleisaun prezidensiál no eleisaun munisipál. Kona-ba eleisaun ba partidu polítiku, kestaun no obstákulu sira ne’ebé bele mosu sei analiza tuir prosesu no nesesidade ne’ebé sei iha.
Jornalista : Ercia Freitas
Editór : Herminio Cardoso