Loluwari Média (Díli) – Sentru Solidaridade Sosiál Inkluzaun Munisípiu Díli (CSSIM) ne’ebé akompañia husi Ra’es Hadomi Timor Oan (RHTO) apoiu ona nesesidade bázika ba estudante Leticia Aprilia ho nia familia.
Apoiu ne’e hafoin Jornalista Loluwari.tl aprezenta ba MSSI ho RHTO ne’ebé publika ona notísia ho nia Títulu ( Luta Kiik; Estudante Defisiénsia Leticia ne’ebé fasilidade lahó asesivel ) .
Tanba ne’e, Diretora CSSIM Eva Mendonça ho nia ekipa ne’ebé MSSI apoiu ba Leticia ne’e obrigatoriu MSSI nian tenke apoiu imediata ho Ai-han humanitaria.
“Ita nia apoiu ne’ebé mak ohin ita fornese ba ita nia alin Leticia mak Foos, ho pakote komplementar nesesidade bázika nian Susuben, Ikan lata, Supermie, Rinso, Sabaun no Mina.”Dehan Diretóra Eva Mendonça ba jornalista Loluwari.tl iha Aldeia Rai Mean Mutudare Díli, sesta (09/10).
Maibé Diretora hatete, kona-ba subsídiu inválidu, Leticia seidauk bele hetan tanba idade seidauk atinje 17 anos, maibé subsídiu kondisionál MSSI sei hein dokumentu husi Inan-Aman nian hafoin bele trata.
“Ita nia alin Leticia Aprilia agora ita seidauk rekera lai nia subsidiu tanba nia foin tinan 9 ne’ebé seidauk tama kriteria tinan 17″dehan nia.
Tanba subsídiu atu atribui ba EhD nian nia tenke kompleta nia dokumentus komprovativu hanesan Bileti Indentidade (BI), Kartaun Eleitoral, Sertidaun Baptismo tenke iha.
Nia haktuir, MSSI ho RHTO akompaña Leticia husi nia eskola, karik Leticia Presiza Kursi Roda mak RHTO sei apoiu hodi utiliza iha eskola.
Maibé se fatin eskola mak laiha Rampa mak MSSI sei halo Aprosimasaun para parte relevante bele bele apoiu halo rampa ba Leticia iha nia eskola.
Ekipa MSSI ho RHTO konversa ho Leticia.FOTO Cesar Pires
Aman Agapito Rangel Gomes sente argullu tebes no agradese tanba Leticia nia kondisaun bele hetan atensaun husi MSSI ho RHTO bainhira Jornalista Loluwari.tl hala’o intervista hodi publika ba públiku.
“Ha’u sente orgullu no agradese ba parte hotu-hotu, maun Jornalista (Loluwari.tl) ne’ebé buka dalan to’o mai ami nia fatin, hanesan família ami agradese ba imi hotu nia servisu no apoiu”dehan nia.
Enkuantu Agapitu mós sei esforsu atu kompleta dokumentus atu nia oan Leticia bele hetan subsídiu kondisionál ne’ebé governu fó ba ema ho kondisaun defisiénsia Fiziku ne’ebé sei idade minor.
Jornalista : Cesar Pires
Editór : Herminio Cardoso