Loluwari Média (Díli) – Xefe Estadu Maiór Jenerál Forsa Defeza Timor-Leste (F-FDTL), Tenente Jenerál, Domingos Raul “Falur Rate Laek”, apresia asaun husi Estudante Universitariu Timor-Leste (EUTL) ne’ebé halo manifestasaun maibé labele halo anarkizmu hodi sunu uma.
“Manifestasaun ne’e normal, husu de’it para ita nia alin sira, ita nia oan sira ho maun-alin sira ne’ebé halo manifestasaun aprende sira nia manifestasaun ne’e tu’ir regra pasifiku labele halo violénsia labele sunu fali uma.” Dehan Xefe Estadu Maiór Jenerál Forsa Defeza Timor-Leste (F-FDTL), Tenente Jenerál, Domingos Raul “Falur Rate Laek” ba jornalista sira, iha Kuartel General Fatuhada Dili, Tersa (16/09).
Falur hatete, uma ne’ebé estadu hari’i ne’e tinan rua nulu resin haat para bele hari’i buat sira ne’e, tanba ne’e husu ba Manifestante sira labele hanoin atu sunu fali.
Tanba asaun manifestasaun ne’e iha ema terseira pesoál (Pihak ketiga) mós envolve hotu iha laran hodi hakarak provoka instabiliza situasaun.
“Ha’u hatene ke sira ne’ebé ke organiza ne’e la halo ida ne’e, juventude ne’ebé hamri’ik ne’e lá’os ida ne’e. Ema terseiru ne’ebé deskontentamentu ulun fatuk moruk nia laran ne’e mak halo ida ne’e.” dehan nia.
Tanba ne’e, Falur husu manifestante sira atu terseira pesoál labele aproveita situsaun no husu manifestante sira ne’ebé halo manifestasaun tenke halo seguransa halo vizilansia.
“Ema ne’ebé espiritu malignu sira, sira iha kotuk para halo problema karik sira (manifestante) sira asegura (amankan) tiha para depois bolu entidade kompetente mai esklarese sira para depois ita hetan solusaun ba problema sira ne’e. Demokrasia ne’e tenke aplika hanesa ne’e.” dehan nia.
Tanba manifestasaun ne’e Estudante EUTL sira nia direitu, no autoridade Seguransa PNTL sira nia kompetensia atu halo seguransa ba Estudante no jovens sira.
Maibé Falur Informa, Asaun ne’e laos kompetensia F-FDTL nian maibé bainhira F-FDTL tama ne’e kuandu situasaun ladiak ona mak governu orienta F-FDTL tama.
“Bainhira ida hanesan ne’e normál manifestasaun ne’e normal. Ha’u husu ba ita nia oan no alin sira apresia sira nia manifestasaun ne’e tu’ir regra pasifiku labele halo violénsia no desturbu.” dehan nia.
Jornalista : Chay Risky