Loluwari Média (Aileu) – Kinta ne’e, Instituto nasional Combate HlV/SIDA (INCSIDA) servisu hamutuk ho ministeriu saude, ho Autoridade Seguransa Polísia Nasionál (PNTL), Komandu Munisípiu Aileu, halo sensibilizasaun iha suku Maumeta, postu Remixio munisípiu Aileu hodi kombate virus HlV/SIDA.
Prezidente INCSIDA, Daniel Marcal, haktu’ir, INCSIDA koopera hamutuk ho Autoridade lokal sira tanba autoridade sira mak na’in ba komunidade. Tanba ne’e autoridade sira mos koopera tanba Virus ne’e perigu tebes ba ema nia vida.
“Ita koordena ho autoridade sira, tanba autoridade sira na’in ba komunidade grasa Deus, tanba durante ne’e autoridade sira hotu koopera tanba sira dehan problema ne’e perigozu tebtebes.”
“Ita mos koopera ho parte religiaun sira tanba HlV ne’e konsekuensia husi moras ne’ebé ladiak entaun igreja ka religaun tenke ko’alia makaas ba moras. Liliu ba joven no kaben na’in sira.” Dehan Prezidente INCSIDA ba jornalista sira iha iha suku Maumeta postu Rémixio, kinta (18/09).
Nia mos husu joven no komunidade sira atu koopera ho autoridade lokal sira inklui parte religiaun no PNTL, nune’e joven ho komunidade sira labele konsumu Droga.
“Ita tenke koopera ho PNTL sira, tanba agora ita haree droga ne’e halo ema nia hanoin la normal, pois la hatene kontrola an. Tanba ne’e ita ko’alia ho autoridade lokal sira no PNTL atu kontrola autoridade komunitariu suku, aldeia para kontrola sira nia bairu. Tanba dalaruma mos HlV mai husi bairu ki’ikoan sira ne’e, tanba sira laiha koñesimentu.”
“Dala ruma HlV transmite mai husi Trafiku humanu, tanba iha grupu balu fasilita mane seluk no halo negosiu feto balu ba fali mane seluk no fetó balu halo negosiu ho feto seluk ba mane sira, ida ne’e mos involve iha trafiku humanu.” Nia argumenta.
Iha sorin seluk komadante komandu munisipiu Aileu, Superentidente polisia, Sebastião Alves da Quintão, agradese ba INCSIDA, involve PNTL iha atividade senbilizasaun hodi transmite informasaun kona-ba tráfiku umanu no droga ba komunidade sira.
“Iha sensibilizasaun ne’e involve mos komadante komandu munisipiu Aileu, durante semana ida ha’u rasik akompaña atu hato’o informasaun balu ne’ebé kle’an, ha’u mos kontente tebes hanesan komadante munisipiu kontente ho sensibilizasaun ba komunidade. Tanba liuhusi programa ida ne’e ha’u bele transmite informasaun balu ligadu ho trafiku umanu no mos droga ba komunidade.”
“Asuntu trafiku humanu hola parte mos ba prevensaun, mezmu haree ba buat ki’ikoan balu akontese ona iha nasaun, maibé nasaun tenke ba oin. Tanba ne’e ba futuru prezisa ema ne’ebé iha koñesimentu atu nune’e sira labele inklina an iha trafiku Umanu.” Nia afirma.
Atividade sensibilizasaun iha suku Maumeta, kinta ne’e hetan partisipasaun maximu husi Komandante Esquadra Remixio, Diretor Saude Aileu, no Diretora sentru saude remixio inklui komunidade sira husi suku maumeta
Jornalista : Nandes