Loluwari Média (Díli) – Estudante Eskola Sekundariu Jeral Fernando “Lasama” Araújo Ainaro Villa, Nelia Bui de Araujo (16) asume kargu nu’udar Komadante Jerál Polísia Nasional Timor-Leste (PNTL), komisaria Jerál Polísia durante oras rua nia laran iha komandu Jerál PNTL.
Durante oras rua estudante ne’e hanesan komisaria Jerál Polísia Nasionál Timor-Leste (PNTL) hodi lidera enkontru ho ofisiál PNTL sira kona-ba preparasaun ba Proklamasaun Indepedensia 28 Novembru 2025.
Hafoin remata enkontru komisaria ne’e kontinua halao vizita ba Diresaun Servisu Investigasaun Kriminál (DSIK), no Diresaun Tránzitu Seguransa Rodaviariu Nasionál.
Nelia Bui de Araujo,orgullu tanba bele hetan oportunidade asume kargu nu’udar Komadante Jerál Polísia Nasional Timor-Leste (PNTL), komisaria Jerál Polísia durante oras rua ni laran.
“Ha’u fó agradese mós ba Komadante Jerál PNTL, fó ona oportunidade mai ha’u asume kargu Komadante Jerál Polísia Nasional Timor-Leste (PNTL), komisaria Jerál Polísia hodi lidera no enkontru ho Ofisiál PNTL”Dehan Nelia Bui Araujo ba jornalista sira hafoin remata asume kargu komisaria Jerál PNTL durante oras rua, iha Kuartel Jerál PNTL, Caikoli, Kinta (09/10).
Méhi,Nelia hatete,hakarak iha futuru sai dunik ajente Polísia ne’ebé nia tenke esforsu hodi estuda makas hodi atinje nia mehi.
Iha fatin hanesan Komadante Jerál Polísia Nasional Timor-Leste (PNTL) Komisariu Jerál Henrique da Costa hateten, programa ida ne’e hetan pedidu husi Plan Internasional, husu ba Komadante Jerál husu tempu oras rua atu estudante Nelia Bui de Araujo husi Eskola Sekundariu Jeral, Fernando “Lasama” Araújo, hala’o kna’ar Komadante Jerál PNTL.
“Iha diskusaun ita aseita programa ida ne’e la’ós foin primeiraves hala’o iha PNTL mais ita akompaña hala’o mós iha Ministériu balun no mós iha Falintil-Forsa Defeza Timor-Leste (F-FDTL)”dehan nia.
Iha tina kotuk,Nia informa,PNTL haree katak momentu ida agora ne’e mós pás tebe-tebes tanba husi parte PNTL realiza ka hala’o hela prosesu rekrutamentu ninian atu enkoraja moós ba alin sira.
Partikularmente ba alin feto sira para atu nune’e labele ta’uk, labele lakon oportunidade atu sai membru Polísia, bele mehi sai membru Polísia bele tuir prosesu bainhira iha Rekrutamemtu bele aplika sai membru Polísia.”
Komadante PNTL hateten, tenke hatene katak sai Polísia ne’e la’ós ema ida mak determina katak tenke Polísia ne’ebé labele sai Polísia de’it Maibé depende ba ida-idak nian.
“Se ita sente hakarak ita bele aplika, tanba ne’e mak alin Nelia Bui de Araujo nia mehi atu sai ajente PNTL, mesmu nia agora eskola hela espera mehi ida ne’e motiva nia estuda didi’ak atu nune’e aban bainrua sei iha vaga Polísia karik nia bele aplika iha futuru”.
Jestora Igualidade Generu no Inkluzaun Plan Internasional, Antonieta Maia, haktuir, atividade ne’e hanesan parte ida Plan Internasional nia programa boot atu promove igualidade ba labarik feto liu-husi empodera sira, no mós mos promove sira nia agensia lideransa.
“Baibain ita halo ida ne’e iha loron 01 fulan Outubru to’o 11 fulan Outubru hodi selebra loron mundiál ba labarik feto tinan-tinan husi labarik feto sira asume pozisaun xavi sira”dehan nia.
Plan Internasional sente orgullu tanba hetan oportunidade no autourizasaun husi komadante Jerál PNTL ne’ebé konsege estudante asume kargu hanesan komisaria Jerál PNTL durante oras rua nia laran.
“Alin Nelia bele aprende oinsa servisu PNTL, no toma desizaun politika sira no mós alin oinsa nia bele atinji mehi iha futuru sai Polísia”dehan nia.
Programa ida ne’e,Nia Informa,bele inspira mós labarik feto sira seluk nia mehi hanesan Nelia atu bele hola parte iha servisu seguransa sira no mehi hanesan sai ajente PNTL karik sira mós sente dalan ne’e nakloke.
Programa husi plan Internasional tinan ida ne’e ohin realiza iha PNTL, sei iha mos ba F-FDTL nomos embaixada Uniaun Europeia, Nova Zelandia, Australia inklui instituisaun governu seluk.
Jornalista : Chay Risky