Loluwari Média (Díli) – Polisia Nasionál Timor-Leste (PNTL) liu husi Komandu Munisípiu Dili halo ona atuasaun imediata hodi sulan xefe ajente membru polisia ne’ebé nakar tiru tohar nia espoza ne’ebé ho kondisaun grávida.
Komandante Munisípiu Díli (KMD), Superintendente Xefe Polísia Orlando Gomes hatete, PNTL ho inisiál JLO ho kondisaun lanu tiru tohar nia fen nia ain iha nia rezidensia aldeia São Jose, Suku Bairo-Pité Postu Administrativu Dom Aleixo, Munisipiu Díli.
Tanba ne’e Komandu dezarma ona hodi detein 72 oras iha sela prosesu kriminál no dsiplinar kontinua hodi prosesu tu’ir mai.
Karik”iha momentu ne’ebá ita nia membru PNTL ho naran inisial JLO ne’ebé mak halo nia reflesaun iha Timor Plaza. Depois iha madrugada tuku 04:00 Otl nia ho kondisaun lanu nia mai iha nia rezidensia fanu nia fen loke odamatan, komu tarde no mosu dezentendimentu depois ita nia membru refere foti pistola karega depois tiru nia fen ninia ain parte loos ruin tohar.” Dehan Komandu munisipiu Díli (KMD), Superintendente Xefe Polisia, Orlando Gomes ba jornalista sira iha eskuadra Dom Aleixo, Segunda (13/10).
Tuir Nia,Kazu tentativa omesidu ne’ebé mak membru Polísia Nasionál Timor-Leste (PNTL) iha eskuadra Dom Aleixo, akontese iha loron Domingo 12 fulan Outubru tinan 2025, hale’u madrugada tuku 04:00 oras TL.
Komadante PNTL ne’e haktuir, momentu akontese família vitima lori kedas ba halo tratamentu iha Hospital Nasional Guido Valadares (HNGV).
“Prosesu ida ne’e ita nia Investigasaun nasionál mak sei atende halo prosesu kona-ba kazu ida ne’e, relatoriu hotu ita hasai ona ba iha komandu para atu nune’e foti medidas husi kriminál ninian no mós sei foti medidas husi prosesu disiplinar ninian, para atu nune’e ita kontinua prosesu ba iha Ministériu Públiku (MP).”dehan nia.
Kona-ba suspende, Nia dehan,ne’e PNTL sei haree prosesu disiplinar ninian sirkunstánsia husi kazu ida ne’e hafoin estuda desizaun ninia pena tanba Instituisaun PNTL ne’e instituisaun Estadu ninian atribui mai iha Polísia para serví povu.
“Sasan Estadu ninian ita utiliza ne’e apoiu hanesan meius ida atu bele halo ita nia seguransa ho di’ak, maibé kuandu ita uza sasan ne’ebé Estadu ninian la tuir regras, la tuir leí ne’e ita sei hasoru prosesu ida rigiroju uituan ne’e grave”dehan nia.
Tanba ne’e,PNTL halo servisu tuir leí disiplinar no bandu hala’o servisu hodi hemu tua lanu, maibé tenke oin moos para atende situasaun seguransa no atende komunidade sira ho di’ak no dignu.
“Se kuandu membru sira utiliza sala armas ne’e tenke prosesu, kazu ne’e akontese armas ne’ebé membru Polísia uja tiru ne’e komandu dezarma kedas no hatama nia iha sela durante 12 Otl hodi halo identifikasaun”dehan nia.
Dadaun ne’e vítima hala’o hela tratamentu iha Ospitál Nasionál Guido Valadares (HNGV) hodi hein prosesu kontinuasaun.
Enkuantu Diresaun Nasional Investigasaun Kriminál halo ona Investigasaun ba membru PNTL ajente xefe Polísia ho naran inisial JLO ne’ebé tiru tohar nia fen nia ain ne’ebé rejistu ho Numeru Uniku Krimi (NUK) 0325/25-PNSIK.
Jornalista : Chay Risky