Loluwari Média (Díli) Fokupers rejista kazu violensia bazeia ba Jéneru Durante fulan walu hahú husi janeiru to’o setembru tinan ne’e hamutuk 179.
Diretora Ezekutiva Fokupers, Domingas Afonso Amaral, hatete, kazu violensia bazeia ba jenero hamutuk 179 no kazu hirak ne’e hamutuk 60 mak kontinua iha prosesu justisa nian.
“Dadus hahu husi Janeiru mai to’o setembru hamutuk 179 ne’ebé mak rejistu iha Fokupers nia data baze no husi kazu hirak ne’e, 60 konsege ita akompaña to’o iha prosesu legál asesu ba iha justisa nian no iha tinan ida ne’e” Asunto ne’e hato’o husi Diretora Ezkutiva Fokupers, Domingas Afonso Amaral, ba jornalista sira, iha Tasi-Tolu Dili. Kuarta (10/12).
Tuir Nia, rezultadu pozitivu balu ne’ebé nia prosesu kazu ne’e aselera lais liu mak kazu violasaun sexual ba minoridade.
Nia haktuir, kazu hirak ne’e maioria violasaun fiziku no violasaun sexuál no mós violasaun ba labarik minoridade, kazu maioria mak kazu Abandona.
“Maioria kazu ne’ebé mak ami rejistu violasaun fisiku, ida ne’e mak ho númeru ne’ebé mak aas maibé ita mós konsiente katak kazu ba iha violasaun sexuál no mós violasaun ba iha labarik menoridade ida ne’e mós kontinua iha númeru ne’ebe mak aas no mós barak liu mak abandona”dehan nia.
Diretora ezekutivu ne’e haktuir, ho kazu hirak ne’ebé mak aas iha TL tanba ne’e agora dadaun parte hotu-hotu no entidade hotu-hotu, komesa halo esforsu hodi prevene liu husi sosializasaun.
Formasaun no mós fahe informasaun liu husi plataforma media sosiál atu bele bolu ema hotu nia atensaun atu halo prevensaun no muda ema nia konsiensia.
“Hau hanoin parte hotu-hotu no entidade hotu komesa halo esforsu lubuk ida atu halo prevenssun liu-liu iha media sosiál no mós sosializasaun”dehan nia.
Entretantu kazu hirak ne’ebe Fokupers rejistus as liu mak husi husi mumisipiu Liquica no munisipiu Ermera.
Jornalista : Felix Fernandes
Editór : Herminio Cardoso