Loluwari Média (Díli) – Prezidente Repúblika (PR), José Ramos-Horta, promete sei hadia Eskola Bazika Filial 1,2 Numeru 09 Setembru Bobo-UFe Tumin, iha Rejiaun Administrativa Espesiál Oé-Cusse Ambeno (RAEOA) iha tempu badak inklui dormitóriu ba estudante sira ne’ebé hela dook.
PR Horta orienta ona funsionáriu Palásiu Prezidensiál atu bele haree kondisaun eskola iha Oesilo.
“Ha’u fó ona orientasaun ba Staff husi Palásiu Prezidensiál atu ba haree kondisaun Eskola presiza saida-saida no materiál saida ha’u sei sosa kedas tanba Logistika Prezidensiál iha ona esperiensia barak, tanba sira halo uma barak ona ho kualidade ne’ebé di’ak.” Dehan Prezidente Repúblika (PR), José Ramos-Horta, ba jornalista sira iha Palásiu Prezidensiál Bairo-Pite Díli, kinta (11/12).
Xefe Estadu Esplika, Urjentemente tenke halo kedas no sei haree mós dormitóriu iha ne’eba atu nune’e Prezidente bele hadia mós dormitóriu.
Hodi tau sala no haris fatin atu nune’e Estudante sira ne’ebé hela dook bele utiliza fatin sira ne’e hodi hala’o nia prosesu aprendisajen, tanba sira mak futuru nasaun ne’e nian.
“Ohin ha’u ko’alia ho estudante sira ne’ebé balu hakarak hela iha dili tanba ne’e ha’u sei ko’alia ho madre sira atu bele simu sira hodi sira hela iha Asrama no ha’u rasik mak bele selu sira nia eskola kada fulan nian” dehan PR.
Tuir PR Horta, bainhira sira hakarak atu ba vizita nia familia PR rasik mak sei selu nia transporte ba mai Oé-Cusse Díli.
Iha fatin hanesan, Diretor Eskola Baziku Filial (EBF)1,2,3 Tumin, Renato Unamet de Jesus lori Estudante no Professores nia naran hato’o obrigadu no agradese ba Prezidente Repúblika ne’ebé sei hadia fasilidade eskola.
Tuir Nia,iha sorumutu ne’e nu’udar oportunidade osan mean ba Eskola Bazika Filial 1,2,3 Tumin ne’ebé bele halao enkontru Ofisiál ho Prezidente Repúblika hodi hato’o Problema ne’ebe eskola enfrenta.
“Ami husi EBF 1,2,3 Tumin ne’ebé ho nia geografikamente iha Fronteira Oesilo nian ne’ebé hetan konvite direita husi Prezidente Repúblika, ne’ebé ami kontente teb-tebes iha ami nia moris tomak”dehan nia.
Eestudante na’in 11 inklui ho manorin na’in 4 maske husi Eskola iha area Rural maibé sira la lakon esperansa ho eskola sira seluk.
Diretór ne’e Esplika nu’udar Jerasaun foun prontu atu servi rai ida ne’e liu-husi Edukasaun iha Area rurál maske ate agora Ministériu Relevante seidauk tau matan ba eskola EBF 1,2,3 Tumin.
“Ohin ami Professores no Estudante sira mos hato’o ami nia preokupasaun durante ami enfrenta no sente iha área rurál ne’eba liu-liu Fasilidade Eskola nian ne’ebé ami sente la konfortavel kadeira meza la to’o no mós bee-moos mós susar ida ne’e mak ami hato’o ba nai Prezidente Repúblika.”dehan nia.
Alende ne’e Manorin nain sira mós fó nia preokupasaun kona-ba distansia estudante sira nian tanba Estudante balun lao ain kuaze kilometro 6 hafoin to’o Eskola tanba tuun foho sae foho.
Tanba ne’e mak Professores sira husu Prezidente Repúblika atu harii Dormitóriu ruma ba estudante sira ne’ebé hela dook hodi bele fasilita sira tuir prosesu aprendizajen.
“Ami nia estudante agora dadaun hamutuk 500 resin husi Primeiru siklu, Segundu siklu no Terseiru siklu ami iha Aula 2 ho nune’e ami fahe ba parte dader no loraik.”
Jornalista : Cesar Pires
Editór : Herminio Cardoso