Loluwari Média (Díli)- Fundadór Fundasaun Ran Amigu Karidade (FURAK) Januario Soares harii ona uma simples ida ba inan ba oan nurak Madalena Mesquita iha Aldeia Suhurama suku lahane orientál postu administrativu Vera-Cruz Munisípiu Dili.
Madalena Mesquita nu’udar inan ba oan nurak ho nia nain rua seluk ne’ebé divórsiu ona tanba nia laen forma familia ho feto kiik seluk ne’ebé Média Loluwari.tl publika ona nia notísia ho títulu (Madalena,inan ba Oan-nurak tutur Luta mesak)
Tanba ne’e Fundadór FURAK hatete,Prosesu halo uma mahon ne’e tanba haree ba kondisaun Madalena ho nia oan nurak ne’ebé nia laen husik ona sira mesak iha uma ne’ebé ho espasu kloot.
“Ha’u sente triste haree kondisaun Bebe ne’e ho nia mãe hela hanesan barak oan ida ho klima rai manas, tempu udan been tama uma laran ho buat sira ne’e hotu ha’u koko atu ajuda ho uma simples ida ne’e ba Bebe ne’e ho nia mae hodi hela.”dehan fundadór FURAK ba Jornalista Loluwari.tl foin lalais ne’e.
Januário esplika,bainhira ekipa FURAK entrega uma simples ne’e,Madalena ne’ebé simu uma ne’e sente kontente tanba espasu luan ona hodi sira bele uza.
Lia-menon murak,Januario Soares hatete,uma ne’ebé ekipa Fundasaun FURAK entrega uza ho didi’ak hodi bele hela hodi kontinua tau matan ba oan sira nia moris.
“Hau nia lia menon ba Bebe ho nia mãe katak uza ba Mahon ne’e ho didi’ak sai hanesan mahon ba ita bo’ot ho nia oan nurak atu nune’e bele kontinua ho moris ba oin tanba laiha ona mane ou aman di’ak iha nia sorin la siknifika moris ne’e paradu maibé moris tenke ba oin.”dehan nia.
Uma ne’ebé ekipa Fundasaun Ran Amigo Karidade (FURAK) halo ne’e ho medida 6×6 ne’ebé kompleta kedas ho fasilidade uma laran hanesan kulsaun,sana,bikan,kadeira meza no sasan nesesidade bázika sira seluk.
Uma ne’ebé ekipa halo durasaun loron tolu ho orsamentu ne’ebé gastu liu rihun ida resin ne’ebé mai husi Kontribuisaun husi sidadaun sira hotu tantu husi rai liur rai laran.
Inan ba oan nurak Madalena Mesquita, sente kontente tebes tanba ekipa Januario Soares bele ajuda nia iha tempu defisil nia laran hodi konsege mós harii mahon ba nia hodi hela ho nia oan sira.
“Ha’u sente kontente tebes tanba Maun Januario Soares ho nia ekipa sira nia ajuda ami bele hetan ona mahon ne’ebé mak kapás tebes”dehan nia.
Madalena mós agradese ba Jornalista Loluwari.tl ho ekipa Januario Soares atu bele hetan grasa saúde di’ak tanba bele ajuda hodi harii uma ba nia.
Alende ne’e,Madalena mós oras ne’e servisu ona iha loja hodi bele hetan osan ba nesesidades lorloron nian ho Kada fulan Madalena hetan Saláriu $ 115.
“Agora ha’u servisu ona iha China Dakings Supermarket Becora Amular ha’u sente Todan ne’ebé durante ha’u leba ho ha’u nia oan nurak ne’e kaman oitoan ona.”dehan nia.
Jornalista : Cesar Pires
Editór : Herminio Cardoso