Loluwari Média (Díli) – Fundador Fundasaun Ran Amigo Karidade (FURAK), harii ona uma ho fasilidade kompletu ba labarik oan kiak mane nain rua Asoko ho Ambere ne’ebé nia inan-aman mate ona.
Fundador FURAK, Januario Soares “Rio” ho vontade tomak iha inisitiva tuir misaun karidade ne’ebé iha hodi harii uma ba Asoko ho Ambere iha Suku Kamea Postu Administrativu Kristu Rei Munisípiu Díli.
Ekipa FURAK konstrui Uma tanba haree ba realidade Asoko nia kondisaun moris,uma ne’ebé nia hela ba grave tanba tempu udan no anin halo asoko sente la seguru.
“Ho situasaun sira ne’e ha’u organiza ami nia ekipa FURAK mai konstrui uma ho medida 4×6 ho durasaun loron 5 ohin ita entrega ho fasilidade uma laran kompleta.” Dehan Fundador Fundasaun Ran Amigo Karidade (FURAK), Januario Soares “Rio” ba jornalista Loluwari.tl iha Kamea Bekora, Domingu (01/02)
Fundadór FURAK ne’e konta,diferensia entre asun karidade ho asaun sosiál asaun rua ne’e iha nia finalidade ida ba mudansa moris ba komunidade.
Tanba asaun karidade ne’e asaun ida ne’ebé mak ligadu ho ema seluk nia di’ak nia esforsu aan buka rasik atu ajuda ema ho empatia ba komunidade ida ne’ebé vulneravel.
Maibé,Nia dehan,bele halo mudansa ba nia moris no ba futuru bainhira asaun sosiál ne’e asaun ne’ebé tipikamente ema barak kualkér see de’it bele simu nia direitu maibé see los mak atu simu.
“Asaun karidade ema ida ne’ebé lao ho nia inisitiva ho nia domin rasik no domin ne’ebé hatudu ba ema sira seluk liu-liu ba komunidade ema ho Defisensia inklui komunidade ema ho Vulneravel sira”dehan nia.
Uma ne’ebé konstrui husi Ekipa FURAK ho durasaun loron 5 ho medida 4×6 ho totál orsamentu hamutuk Rihun ida resin,ho ekipa FURAK membru nain 8 ho Voluntariamente mak harii uma ba Alin Asoko.
Oan kiak Ruzero da Conceicão Feliz naran istimadu (Asoko), ho idade 13 ne’ebé nia Inan-aman husik nia ho nia alin Ambere.
Asoko, labarik mane foinsae ida ne’ebé nia maun Ambere fahe malu,nia maun ba eskola ona iha Munisípiu Likisa ho nia familia balu.
“Ha’u hela mesak tanba ha’u ho ha’u nia maun Ambere mak hela iha uma ne’e maibé ambere deside ba eskola iha Liquiça ha’u mak iha ne’e hanesan maun sira mai haree ho matan.”dehan nia.
Asoko konta ho sentimemtu triste bainhira tinan hirak nia laran sira lakon Inan-Aman ho kondisaun uma ne’ebé at.
Maibé, Tinan ne’e nu’udar grasa ida tanba Fundadór FURAK Januario Soares promete konsege harii uma ona ba sira inklui nesésidade bázika sira seluk.
“Ha’u hela mesak iha ne’e hodi ba eskola ha’u fila mai ha’u tuur ho triste tanba hau tinan sei kiik hau seidauk iha forsa atu harii uma rasik, ha’u kontente tanba bele hadia ha’u nia uma”dehan nia.
Enkuantu uma ne’ebé FURAK entrega ba Asoko ho fasilidade kompletu mak hanesan,bikan,kanuru,kulsaun,sumasu,meza,kadeira no sasan sirak ne’ebé ASOKO nia presiza.
Alende ne’e,iha momentu Ekipa FURAK entrega uma ba Asoko,ekipa selebra mós Fundadór nia Tinan.
Jornalista : Cesar Pires
Editór : Herminio Cardoso