Loluwari Média (RAEOA) – Organizasaun Non-Governamentál (ONG), Fundasaun Esperansa Enclave Oé-Cusse (FEEO) fó kapasitasaun hodi promove empoderamentu ekonomia feto iha Rejiaun Administrativa Espesiál Oé-Cusse Ambeno (RAEOA).
Diretora FEEO, Paulina Tunis, hatete, programa ne’e atu promove empoderamentu feto sira hodi bele hatene utiliza mákina suku roupa nian.
“Ami nia atividade oioin durante tinan tolu nia laran, iha grupu, atividade ida ohin realiza formasaun ba iha alfaiaty bázika ba membru grupu feto sira.” Dehan nia ba jornalista sira iha Palaban Pante Makasar, kuarta (12/02).
Nia dehan, formasaun ne’e atu sira bele hatene uza mákina ne’ebé mak fahe ona, no mós sira iha koñesementu klean ba mákina atu bele suku no halo kriatividade loroloron nian.
Kapasitasaun ba feto sira ne’e importante atu sira bele dezenvolve di’ak liutan hanesan suku roupa nian, modifikasaun tais ba vistidu, jas inklui pasta no seluk tan.
“Tanba ne’e atu ajuda sira hodi aumenta rendimentu, husi atividade ne’ebé mak sira halo ona atu hamenus problema uma laran nian, ne’e importante ba maluk feto fo’in sa’e sira, liu husi formasaun ne’e bele aplika ba sira nia moris lor-loron nian” dehan nia.
Tuir Nia, iha grupu 8 ne’ebé mak partisipa iha formasaun no ONG FEEO fahe ona makina 8 ba sira hodi suku,no fo formasaun ba sira oinsa sira bele hatene atualiza rasik.
Nia dehan, grupu 8 ne’e mai husi suku Bobokase, suku Lela ufe no suku Sune ufe no mós aumenta ho Sucu Taiboko.
ONG FEEO mós enkoraja nafatin Feto maluk sira atu labele baruk aprende suku tais no seluk tan tenke esforsu an liu husi formasaun ne’e atu nune’e bele hatene suku roupa.
Iha fatin hanesan Formadora, Ermelida Pareira, esplika Formasaun ne’e fahe loron rua de’it, oinsá atu hadi’a makina no monta kabas ba daun no balun ne’ebé hatene la presiza hanorin no balun ne’ebé la hatene presiza atu hanorin.
“hatene ba suku nian presiza tempu naruk, prosesu ba semana ida ou fulan ida no hanorin ba sukat no suku mak hanesan, kalsa, saia, vistidu kabaya, pasta no seluk tan” dehan nia.
Tanba suku kabaya, pasta feto balun senti triste tanba difisil ne’ebé tenke hanorin to’o semana ida, maibé ba ema ne’ebé hatene entaun nia prosesu loron ida rua nia bele kontinua ona.
Membru Grupu Tamsan Bisone, Ajelina Punef, kontente ba formasaun ne’ebé ONG FEO fó ba sira hodi bele apoiu ona makina suku nian ba sira atu bele utiliza.
“Ami kontente tanba ONG sira bele fasilita makina suku nian mai ami nia grupu atu ami bele utiliza hodi suku ropa, pasta, kalsa no saia sira ne’e”dehan nia.
Jornalista Estajiária : Imaculada Tefa
Editór : Herminio Cardoso