Loluwari Média (Gleno) – Ministériu Komérsiu no Indústria (MKI) hahú hatuur ona fatuk dahuluk ba modernizasaun merkadu Munisípal foun iha postu Administrativu Gleno Munisípiu Ermera.
Ministru MKI Nino Pereira hatete,lansamentu ne’e nu’udar marka pasu ida importante ba Dezenvolvimentu Komérsiu iha Timor-Leste espesiál iha Munisípiu Ermera.
“Merkadu foun (Ermera) Oportunidade foun ba dezenvolvimentu ekonomia lokál, ita tenke reforsa duni ita nia ekonomia lokál tanba dezenvolvimentu ekonomia nia baze mak fator determinante ba progresu hotu ba dezenvolvimentu ekonomia nasaun nian.” Dehan Ministru Nino Pereira iha nia diskursu iha Gleno sesta-feira (06/02).
Tuir Nia,Timor-Leste presiza nia infraestrutura ne’ebé mak sufisiente hodi dudu nafatin ekonomia ba oin tanba ekonomia sai fatór determinante ba transaksaun ekonómika iha rai laran liu-liu ba povu TL.
“Ita sei investe ba iha merkadu tanba ita nia produtu lokál barak ne’ebé abandona hodi ita nia Inan-aman ou vendedór sira faan iha merkadu tinan barak nia laran”dehan nia.
Nia dehan,Governu presiza mós TL nia produtu lokál sira atu promove tuir komunidade sira nia nesesidade,tenke investe iha merkadu tanba setór privadu ne’e importante.
Ministru MKI Agradese ba komunidade sira hotu-hotu nia kolaborasaun no kontribuisaun,espesiál ba rai nain ne’ebé oferese nia rai ba govermu hodi bele konstrui merkadu Munisípal Ermera nian.
“ohin ita halo lansamentu primeiru pedra ba konstrusaun Merkadu Munisipál iha Munisípiu Ermera Postu Administrativu Gleno.”dehan nia.
Governante ne’e nafatin iha esperansa ba komunidade sira iha Gleno atu fasilita ba estrada sira ho di’ak atu bele halo movimentu ba mai tula produtu lokál na merkadu.
Tanba konstrusaun ba Merkadu Munisípal ne’e ho durasaun tinan ida ho balun ho ba kompaña karik termina iha 2027 povu Ermera bele utiliza ona.
Prezidente Autoridade Munisípiu Ermera, José Martinho Dos Santos Soares sente orgullu bo’ot ba Ermera oan tanba bele lansa ona fatuk dahuluk ba Merkadu Munisipál.
Tanba ne’e husu ba Ermera oan labele laran taridu tenke halo dunik konstrusaun ba Merkadu Munisípal,tanba ida ne’e mak Dezenvolvimentu.
“Ha’u husu ba komunidade sira ohin imi nia partisipasaun sai sasin ba ita nia dezenvolvimentu ne’ebé ita nia governu esforsu hela”dehan nia.
Nia hatutan,Ermera oan tenke hamutuk fo liman ba malu labele halo inpedimentu,karik iha problema tenke rejolve tanba merkadu ida ne’e merkadu Munisípál no merkadu Internasionál.
Autoridade Munisipiu ne’e husu mós jestaun Merkadu atu halo nia servisu atu nune’e merkadu Gleno labele sai ona merkadu tradisionál.
Maibé merkadu modernu, tanba ne’e tenke kontrola ba fatin estasionamentu ne’ebé trasnporte públiku hodi selu tuir planu ne’ebé governu estabelese tiha ona.
Enkuantu Kompañia Henan Fifth Construction Group Co.,Ltd (China) mak manan nain ba projetu konstursaun Merkadu Munisípal Ermera ho Durasaun Tinan ida ho balun ho nia orsamentu montante hamutuk millaun $ 8.861.517,89.
Entretantu sei iha tan Merkadu Munisipál rua seluk ne’ebé MKI sei halo lansamentu tan mak hanesan Merkadu Munisipál Lospalos ne’ebé sei konstrui husi kompañia Divita CO Unipessoal, Lda (Timor-Leste) no Merkadu Munisípal Baucau.
Jornalista : Cesar Pires
Editór : Herminio Cardoso