Loluwari Média (Díli) – Deskonfia kompañia ajénsia Zitayamora halo kobransa ilegál ba sidadaun kuaze 100 resin ne’ebé hatama osan hamutuk montante rihun $3,800 atu ba servisu iha Nasaun Portugál.
Portavós Vitima ba Ajensia Zitayamora Julião de Souza hatete,na’in ba ajénsia Zitayamora Sr.Edmundo Soares Martins bosok Timor oan hodi trata Vistu Traballu ne’ebé atu ba servisu iha Portugál maibé to’o oras ne’e laiha rejultadu.
“Relasiona ho Promesa ajénsia nian ohin ami hamutuk 100 resin sai vítima ba ajénsia Zitayamora lori osan ema ida ho montante $ 3.800 no DP $ 1.500 ba ajénsia Zitayamora iha 06/12/2025 ate 2026 iha fatin Aldeia Osindu 1 Postu Administrativu Dom Aleixo Munisípiu Díli.” Dehan Portavós ba jornalista sira iha Osidio 1 Díli, Tersa (07/07).
Nia dehan Osan ho montante $ 3.800 ne’ebé vítima sira hatama ba Ajénsia Zitayamora atu fasilita Vitima sira hodi vistu Traballu atu ba servisu iha Portugál maibé ikus mai hamosu problema iha ajénsia.
Ho situasaun hirak ne’e obriga vítima sira halo karta kanselamentu atu nune’e sira bele foti fila sira nia osan ne’ebé durante ne’e hatama ona ba ajénsia Zitayamora ne’e.
Tanba na’in ba Ajénsia Zitayamora laiha responsabilidade ba vítima sira nia dokumentus, no falsifika dokumentus,tanba vítima na’in tolu viajen ba Portugál hetan deportasi husi Migrasaun Indonézia nian iha Aeroportu Bali.
“Sr.Edmundo Soares Martins halai lakon no laiha liña komunikasaun mai ami, tanba ne’e mak ami Vitima mai iha nia rejidensia ajénsia Zitayamora maibé na’in ba ajénsia Zitayamora laiha no nain ba ajénsia ameasa ami ho viza Australia no Portugál ne’ebé iha atu nune’e ami bele mai iha ajénsia ida ne’e maibé na realidade na’in ba ajénsia halai lakon.”
Tanba ne’e,Vitima sira halo ona keixa ba iha Polísia Nasionál Timor-Leste (PNTL) Polisia Cientifika Investigasaun Criminal (PCIC-Sigla Portugés) no ba iha Ministériu públiku (MP) maibé ate agora seidauk iha resposta durante fulan 4 ona na’in ba ajénsia mós laiha informasaun ruma ba vítima sira.
“Ami sei hela iha rezidénsia ajénsia Zitayamora hodi hein nia resposta tanba ami vítima sira foti ema nia osan ho funan 10%.”
Ajénsia Zitayamora iha nia advogado na’in 2 ne’ebé trata Vitima sira nia dokumentus iha Embaixadór Portugál nian maibé na realidade advogado ajénsia Zitayamora halo falsifikasaun dokumentus no haruka vítima sira fila, tanba Server.IP fó lisensa ba Ajénsia Zitayamora ne’e atu fan de’it bilete Aviaun nian laos atu trata vistu de Traballu nian.
“Ami husu na’in ba ajénsia Zitayamora atu responsabilidade ba aktu ne’ebé nia komete no ami husu ba autoridade Segunda PNTL no PCIC atu haree na’in ba ajénsia ne’e labele halai sai husi Teritoriu Nasionál no ami vítima sira fó tempu ba ajénsia Zitayamora atu bele hasoru ami iha loron 3 nia laran bainhira la hasoru ami mak ami vítima sira sei organiza malu hodi okupa nia rezidénsia no hein nia selu hotu ami nia osan mak ami sai.”
Iha fatin hanesan Vitima Saturnino de Jesus Varela reforsa,bazeia ba deklarasaun ne’ebé vítima hetan nia data liu ona ate agora seidauk iha informasaun ba sira atu ba Portugál.
“Tanba ne’e mak ami ezije nafatin na’in ba ajénsia Zitayamora atu selu fila-fali ami nia osan,se laiha mak ami sei organiza malu mai hela iha rejidensia ajénsia Zitayamora nian tanba na’in ba ajénsia Zitayamora nunka mais atu atende ami nia telefone no sms ruma mai ami no abandona mós nia Rejidensia ate agora.”
Jornalista : Cesar Pires
Editór : Herminio Cardoso