Loluwari Média (Díli) – Hahú semana oin komisaun Rekrutamentu Selesaun Juizes ba Supremu Tribunál Justisa loke konkursu ba juri kona-ba implementasaun Instala Supremu Tribunál Justisa iha Timor-Leste.
Membru Komisáriu komisaun rekrutamentu selesaun Juizes ba Supremu Tribunál Justisa Avelino Coello aprezenta preparasaun rekrutamentu juri kona-ba Rekrutamemtu Supremu Tribunál Justisa iha TL ba Prezidente Repúblika José Ramos Horta.
“Ami ohin lori dokumentus ne’ebé nesesáriu atu prosede ba rekrutamentu juri prontu ona, ne’ebé semana hira mai tan ami sei halo ona rekrutamentu ba juri para bele kompoin ona juri ida hafoin loke konkursu ba Supremu Tribunál Justisa no Tribunál de Rekursus”dehan nia ba jornalista sira iha Palásiu Prezidensiál Bairo-Pite Ai-tarak laran kinta-feira (19/02).
Tuir Nia,Primeiru sei rekruta uluk juri tanba tuir Lei hateten katak presija Juiz Konselleiru hodi sistema sivilista no ho lian Português, entaun loke ba supremu Tribunál Justisa Vaga ba hitu no ba Tribunál Rekursu ne’e 9.
Tuir Lei organizasaun judisiáriu iha nia espozisaun trTanzitóriu ne’e, Juiz ne’ebé maka kareira servisu liu ona tinan 10 mak nia bele konkore, tantu ba supremu Tribunál no mós ba Tribunál Rekursu.
“Agora faze ida mai oin ne’e sei komesa ho rekrutamentu juri, tanba juri ne’e mak sei fo konkursu, laos komisaun tanba komisaun administra de’it prepara kondisaun”dehan nia.
Tanba ne’e mak dokumentus ne’ebé mak atu tulun prosesu rekrutamentu juri komisaun ne’e finaliza ona no rejimentu internmu komisaun nian atu regula komisaun reuniaun regulamentu avaliasaun dokumentál aprovadu ona,manuál ba juri aprovadu no mós kalendáriu atividade hotu.
“Ami mai hato’o hela ba Prezidente katak posibilidade 20 de agostu ou 30 de agostu, 28 de Setembru data ne’ebé komemorativas ne’e bele mós ita instala ona supremu Tribunál Justisa iha tinan ida ne’e nia laran hafoin ita prosede ba Tribunál de Rekursus”dehan nia.
Entretantu Prezidente fó ninia perspetiva balu,ho hanoin kona-ba kalendarizasaun maibé Prezidente depende ba rezultadu servisu komisaun rekrutamentu no selesaun juiz nian.
Jornalista : Cesar Pires
Editór : Herminio Cardoso