Loluwari Média (Baucau) – Ministru Defeza (MD), Kontra Almirante, Donanciano Costa Gomes “Pedro Klamar Fuik”, hatete, tinan 20 resin ona, foin primeira vez Militár na’in tolu susesu iha sira nia estudu iha Akademia Militar Portugal.
“Foin dahuluk, tinan 20 resin dezenvolvimentu iha ita nia forsa, foin dahuluk Militár na’in tolu ne’ebé mak susesu hodi konklui sira nia estudu iha Akademia militár iha Portugal, tanba kadaves ita haruka Militár sira ba rai liur, ba nasaun Portugal foin dahuluk sira na’in tolu mak iha rejultadu positivu, tanba ne’e fou-foun sira na’in haat mak ba, maibé na’in ida fila tiha depois hela na’in tolu, no sira nain tolu desenvolve sira nia kapasidade ho sakrifisiu hotu-hotu ne’ebé sira halo, hanesna akademia sira forma militarmente.” Dehan Ministru Defeza (MD), Kontra Almirante, Donanciano Costa Gomes “Pedro Klamar Fuik”, ba jornalista sira, hafoin promosaun ba alferes na’in 3 iha komponente terestre Baucau, sexta (13/12).
Governante ne’e hatete, militár hotu-hotu durante tinan 20 nia laran haruka ba rai liur hodi hala’o nia estudu akademia militár maibé sempre falla. Ohin loron foin militár na’in tolu mak konklui sira nia estudu masteru iha Akademia Militár iha Portugal.
“Ita mos iha militár ne’ebé agora daudaun hala’o hela akademia militár iha Jepan, Indonésia, China, Australia no agora sira frekuentamente iha Akademia Militár iha Portugal signifika tinan balu tan ita iha ofisiais ne’ebé mak ho formasaun akademia no profisional militár ne’ebé iha formasaun ne’ebé profisaun ba kareira iha tinan 30 ita bele haree final ba sira hanesan mos superior no Coronel nomos bele sai mos ba General.”
Xefe Estadu Maiór Jenerál Forsa Defeza Timor-Leste (F-FDTL), Tenente Jenerál, Domingos Raul “Falur Rate Laek”, hatete, aspirante na’in tolu promove ba Alferes hafoin remata sira nia estúdu iha akademia Militár Portugal no daudaun hala’o servisu iha Instutisaun F-FDTL.
“Ohin ita realiza serimonia juramentu Bandeira Repúblika Demokratika Timor-Leste (RDTL) ne’ebé ita nia Kadetes na’in tolu husi aspirante ba Alferes iha komponente Terrestre Baucau.”
Juramentu ba bandeira Nasional ba kadetes militar foun na’in 3 ne’e foin akontese iha Instutisaun F-FDTL, tanba militár na’in 3 ne’e remata studu Akademia Militar Portugal.
“Ita tenke orgullu ba timor laran tomak, no ita nia relasaun diak ho Militar Portugal nian, durante 24 anos formasaun dezenvolvimentu Militár nian ita la konsege, akademia Militár nian ne’e falla hotu, foin dahuluk ita nia militár nain 3 ne’e bele hasai Lisensatura, no Masterdu iha Portugal no agora ita tenke adapta fali.”
Alferes Alessandro Revés Emanuel Lopes Soares, agradese ba Komandu F-FDTL no MD tanba bele promove ona husi Aspirante ba Alferes hodi sai ofisias ba Militar iha Instutisaun F-FDTL.
“Ha’u nia agradesementu ba Instutisaun F-FDTL tanba halo ona kooperasaun ho Portugal, no ami bele hala’o ami nia formasaun akademia militár iha Portugal to’o remata.”
“Iha Portugal ha’u hasoru dezafiu psikologiku no fiziku maibé ha’u la haluha kamara husi Timor-Leste no Portugal nia apoiu no mos familia ha’u nia inan nia orasaun mai ha’u durante ha’u nia estudu iha Portugal to’o ha’u remata. Ohin loron ha’u bele sai Alferes iha komponente terestre.”
Jornalista : Chay Risky