Loluwari Média (Díli) –Komandante Munisípiu Díli (KMD), Superintendente Xefe Polisia, Orlando Gomes, hatete, durante selebrasaun natal husi loron 24 to’o 25 Dezembru 2024, Komandu PNTL Dili detein suspeitu na’in 21 tanba envolve iha krime danu com violensia no obstrusaun ba autoridade.
“Total suspeitu sira ne’ebé ita kaptura durante iha loron 24 ho 25 detein kuaze ema na’in 21. Agora daudaun iha hela sela depois ita aprezenta ona ba Ministeriu Publiku (MP) hodi prosesu kontinuasaun.” Dehan Komandante Munisípiu Díli (KMD) Superintendente Xefe Polisia, Orlando Gomes, ba jornalista sira iha Eskuadra Dom Alexo Aimutin Dili, kinta (26/12).
Gomes relata, iha loron 24 mosu krime danu com violensia ne’ebé akontese iha merkadu Taibessi. Nune’e polisia asegura ema na’in 10 maibé depois halo tiha ba sira ne’e iha ema na’in rua mak sai hanesan autor prinsipal ba kazu ne’e no oras ne’e daudaun suspeitu na’in rua detein ona iha sela detensaun Komandu PNTL Dili hodi kumpri 72 oras molok aprezenta ba MP.
“Iha loron 24 kalan mosu kazu obstrusaun autoridade publika iha Lahane, diskunfia iha grupu joven sira asalta hodi baku servisu sekretu forsa Defeza Timor-Leste (F-FDTL) ida ho akontesimentu ne’e Taksforce hamutuk eskuadra Na’in Feto ho operasaun konjunta halo kedas kapturasaun ba ita nia joven sira ne’e hamutuk ema na’in-17 lori mai Komandu PNTL Dili hodi halo identifikasaun.”
Suspeitu na’in 17 ne’e iha na’in rua mak minoridade PNTL liberta tiha ba uma no na’in 15 mak detein iha sela hodi submete ba 72 oras depois aprezenta ba MP.
“Iha loron 25 mosu kazu Danu Simples ida iha Bebonuk, suspeitu Hemu lanu ba baku Xineza ida to’o oklu rahun no suspeitu momentu ne’e ita halo kedas kapturasaun lori mai kedas iha Komandu hodi detein kedas iha sela detensaun kumpri oras 72.”
Iha loron 25 mosu kazu arma branka ne’ebé akontese iha Fomentu II, kazu ne’e la’os grupu, maibé ne’e kazu individual, no suspeitu na’in rua uza Samurai atu ta’a vitima no patrulla Eskuadra Dom Aleixo to’o kedas iha fatin akontesimentu halo kapturasaun ba suspeitu na’in rua ne’e lori kedas mai iha Komandu PNTL Dili hodi halo detensaun.
Iha 25 dezembru mosu tan kazu ofensas integridade fizika simples ho Danu simples ne’ebé mak akontese iha Hera postu administrativu Cristo Rei no PNTL detein suspeitu na’in ida ba kazu ne’e.
“Total suspeitu sira ne’ebé ita detein iha dia 24 to’o 25 dezembru foin daudaun ne’e mak hamutuk ema na’in 21. Sira ne’e agora detein ona iha sela detensaun.”
Fukun loloos husi kazu akontese primeiru joven sira lanu hafoin sira ho sira iha odiu no vigansa partikular depois aproveita loron bo’ot sira konsumu alkohol mak halo problema.
Jornalista : Chay Risky