Loluwari Média (Díli) – Komandante Unidade Polisia Maritima (UPM), Superintendente polisia, Eugenio Pereira, hatete, progresu manutensaun ró UPM ho naran BP. 601 Lusitania ne’ebé halo husi empreza Bibora Atauro Express foin atinji pursentu 20.
“Ita haree prosesu andamentu relasiona manutensaun ró Lusitania desde inisiu empreza halo ona servisu ho diak, lori ró husi tasi laran mai iha rai maran. Observasaun ne’ebé mak UPM halo ba manutensaun ró Lusitania foin atinji pursentu 20.” Dehan Komandante UPM, Superintendente Polísia, Eugenio Pereira, ba jornalista sira, iha Kuartel UPM Sional, Dili, sexta (27/12).
Eugenio dehan, empreza hahu hamoos ró nia parte externa, inklui vidru besik remata, depois kontinua parte interior.
“Ita bo’ot sira haree empreza komesa hamoos ró nia parte liur, sira hadia vidru sira no hadia ro nia body sira. Bainhira empreza konklui ona mantensaun parte external ró, empreza sei kontinua haree fali parte interior ró fatin navegasaun no ba ró nia makina.”
Superior ne’e husu empreza, Bibora Atauro Expres, atu servisu tu’ir kontratu ne’ebé mak selebra ho Komandu Jeral PNTL ba manutensaun ró Lusitania.
“Empreza tenke halo tu’ir kontratu ne’ebé selebra ho Komandu Jeral PNTL ba manutensaun ró ne’e fulan neen to’o tinan ida empreza tenke finaliza manutensaun ba ró ne’e. Kuandu la finaliza mak ami sei fo relatoriu ba Komandu Jeral atu foti medida ba empreza ne’e tu’ir lei aprovizionamentu nian.”
Komandante ne’e husu ba empreza Bibora Atauro Express tenke halo servisu ho diak nune’e bele finaliza manutensaun ró Lusitania tu’ir kontratu.
Jornalista : Chay Risky