Loluwari Média (Díli) – Komadante Interinu Eskuadra Dom Aleixo, Inspetor Asistente Polísia, Domingos Pinto, husu joven sira iha suku Bebonuk atu kria paz no estabilidade iha suku laran no hadomi inan-aman sira nomos Autoridade lokál suku Bebonuk.
“Ha’u husu Inan-Aman sira liliu ba Joven sira iha suku Bebonuk atu kria paz no estabilidade nune’e ema hotu bele moris iha dame ksolok no feliz nia laran, ha’u husu mos ba Joven sira atu fo domin ba inan-aman, tanba ema riku no moris diak sei fo buat barak ba nia inan-aman maibé ita kiak la presiza fo buat barak maibé fo domin ba ita nia inan-aman ho domin ida ne’ebé mai ho sentimentu ida ne’ebé klean.” Dehan Komandante Interinu Eskuadra Dom Aleixo, Inspetor Asistente Polísia, Domingos Pinto, ba jornalista sira, iha sede suku Bebonuk, Dili, sabadu (28/12).
Inspetor Pinto, hatete, joven sira labele buka problema iha tempu loron bo’ot maibé buka meius atu kria paz no estabilidade no hadomi ba Inan-Aman kontente hodi hala’o idak-idak nia moris.
“Ha’u husu ba Joven sira, ita nia inan-aman sira nia tempu liu ona, maibé idade hanesan imi seidauk to’o tanba ne’e mak husu ba Joven sira, Polísia Nasionál Timor-Leste (PNTL) la predujika ema ida, tanba PNTL iha mak Povu iha nune’e lalika rai odiu no vigansa, tanba PNTL sempre servisu ho neutralidade tanba ne’e joven sira nia kondisaun ne’e importante ba rai ida ne’e.”
“Ha’u lakohi ha’u nia Joven sira iha ameasa no intimidasaun nia laran maibé kuidadu imi nia an no kuidadu imi nia saude tanba nasaun presiza joven ne’ebé matenek atu servi sira nia rai, tanba joven mak futuru nasaun.”
Bainhira joven sira halo problema bebeik mak sei hasoru buat tolu, mak Hospital, Prizaun Becora no lakon vida (mate) ka ba aldeia la fila.
Xefe suku Bebonuk, Alfredo da Costa, hatete, joven sira halo dialogu ho autoridade lokal iha suku Bebonuk nomos autoridade seguransa PNTL Eskuadra Dom Aleixo atu buka solusaun ba problema, tanba suku Bebonuk mai ho nia karakter ida ne’ebé (keras) ka to’os.
“Ha’u fiar katak ho dialogu ida ne’e joven sira sei hamutuk buka solusaun atu kria paz no estabilidade iha suku Bebonuk ida ne’e tanba suku Bebonuk mai ho Karakter ida ne’ebé ho (keras) no la fasil ita atu muda ema nia pensamentu maibé ami la’o neneik sei hadia ba oin ho diak.”
Autoridade lokal ne’e promete sei la akontese tan problema, tanba Autoridade lokal ne’e sei la hakmatek bainhira joven sira halibur malu no halo problema, nia rasik mak sei entrega ba autoridade seguransa (PNTL) atu garante paz no estabilidade iha suku.
Lider Artemarsiais Persaudaraan Setia Hati Terate (PSHT), Manuel F. Coelho, hatete, joven husi grupu PSHT sei garante ba paz no estabilidade bainhira se mak halo problema mak lider ne’e sei akompaña ho autoridade seguransa PNTL hodi halo kapturasaun.
“Ha’u nia hakarak suku Bebonuk ne’e hakmatek no ha’u husu ba joven sira atu kria paz no estabilidade haluha passadu hanoin ba futuru.”
Eis Xefe juventude Bebonuk, Cristiano de Araujo Carvalho, sente orgullu tanba PNTL Eskuadra Dom Aleixo bele halo dialogu ho komunidade liliu joven sira iha suku Bebonuk atu garante paz no estabilidade, nu’udar joven prontu kolabora ho autoridade lokal nomos autoridade seguransa atu garante seguransa iha suku Bebonuk.
“Ha’u nu’udar joven ida iha suku Bebonuk, ha’u iha responsabilidade moral atu kontrola ha’u nia joven sira hodi kria paz no estabilidade nune’e suku Bebonuk bele hakmatek nune’e inan-aman sira bele la’o livre hala’o sira nia atividade.”
Jornalista : Chay Risky