Loluwari Média (Díli) – Komandante Munisípiu Díli (KMD), Superintendente Xefe Polisia, Orlando Gomes, hatete, daudaun ne’e servisu sekreta PNTL kontinua buka tu’ir suspeitu ne’ebé tiru bala musan ba rezidensia eis Prezidente republika Lu-Olo iha Farol foin lalais.
“Agora daudaun ne’e ekipa sekretu sira sei buka hatene motivu husi insidente ne’e.” Dehan Komandante Munisípiu Díli (KMD), Superintendente Xefe Polisia, Orlando Gomes, ba jornalista sira iha eskuadra Dom Aleixo Dili, sesta (03/01).
Orlando rekuñese, iha loron 31 dezembru oras zero zero iha akontese duni iha eis Prezidente Republika (PR) Lu-Olo nia rezidensia Farol, mosu insidente, ema deskuñesidu tiru bala musan ba Eis PR Lu-Olo nia rezidensia.
“Hafoin akontesimentu patrulla Eskudra Vera-Cruz ho Investigasaun to’o kedas iha fatin akontesimentu hodi halo atuasaun no halo konfirmasaun ba insidente ne’e, no iha insidente ne’e loos duni no hetan duni inbolku (monisoes) ne’ebé mak monu iha kalen leten borus tun kedas ba iha belador depois belit kedas iha belador nia hena.
“Momentu ne’eba ita nia eis-titular, eis PR Lu-Olo ho familia sira mai asiste ema tiru paison iha liur hodi selebra tinan foun, depois fila tama fali ba mak haree no konsege identifika katak hetan inbolku.”
Nia afirma, hafoin akontesimentu ne’e ekipa eskudara Vera-Cruz to’o kedas iha fatin hodi haree inbolku duni nune’e ekipa halo tiha ezaminasaun ba lokal krime hamutuk ho polisia forensiku sira ne’ebé momentu iha fatin ne’eba no ikus mai eskudra entrega kazu ne’e ba Departamentu Investigasaun Kriminal (DIKN) hodi kontinua prosesu investigasaun ba kazu ne’e.
“Kazu ida ne’e ita atende kedas no momentu ne’eba forensik mos iha, entaun kazu ida ne’e ita entrega ona ba investigasaun nasional mak kontinua halo prosesu.”
“Suspeitu ba kazu ne’e PNTL seidauk identifika ema ruma tanba kazu ne’e sei deskonesidu hela, tanba ne’e, prosesu iha identifikasaun husi polisia foti ona informasaun eis Xefe Estadu, Francisco Guterres Lu-Olo, ho nia familia sira momentu akontesimentu no agora daudaun investigasaun nasional mak kontinua halo prosesu.
Jornalista : Chay Risky