Loluwari Média (Díli) – Fundasaun Mahein (FM) garante testr eskrita vaga foun ba membru Polísia Nasionál Timor-Leste ne’ebé halao iha Komisaun Funsaun Públika (KFP) sei lao ho transparante.
Diretór FM Nelson Belo hatete, teste kulturál ba vagas PNTL ne’ebé mak agora iha utiliza elektronika dijitál sei lao di’ak no transparante ba ema hotu.
“Entaun hakarak kongratula ba instituisaun PNTL ne’ebé mak iha kooperasaun hamutuk ho funsaun públika halo ida ne’e”dehan nia ba jornalista sira iha Comisaun Funsaun Públika Matadoru Díli, kinta (08/10).
Diretór Ezekutivu esplika, ho teste bazea ba elektronika ne’e atu dehan ba públiku katak ne’e prosesu ida ne’ebé mak selesaun transparante akontabilidade iha prosesu teste ne’e.
“Ne’e atu dehan ba ita katak prosesu eletróniku la haree ba se mak se, se mak liga se, maibé ida ne’e teste duni nia abilidade nia kapasidade ba komprensaun sira ne’ebé mak iha.”
Ho teste Prova kulturál ida ne’e pasa bele lori sira ba teste tuir mai mak Teste psikolojia no teste Saúde, maibé se la pasa ida ne’e bele bolu ona sistema eleminativu.
“ida ne’e bele esplika mai ita katak iregularidade sira ne’ebé akontese iha rekrutamentu ka prosesu sira dahuluk sai referensia ba ita. Ita to’o iha agora ita hahú transparansia iha akontabilidade ne’ebé mak di’ak”dehan nia.
FM husu atu instuisaun hotu-hotu tenke halo tuir modelu teste ne’ebé mak PNTL halo ona.
Tanba ne’e Fundasaun Mahein garante transparansia iha rekrutamentu ida ne’e tanba Prosesu dijitalizasaun la’ós garante pursentu 100 maibé ne’e possibilidade transparante dunik.
Kandidatu 11.391 hahú submete ba prova kulturál
Enkuantu Kandidatu vaga rekrutamentu membru Polísia Nasionál Timor-Leste (PNTL) hamutuk 11.391, kinta-feira ne’e submete ona ba teste kultura tuir Munisípiu ida-idak.
Prova kulturál ne’e hahú kedan iha tuku 7:00 dader iha edifisiu Komisaun Funsaun Públika Matadoru kandidatu husi Munisípiu Aileu mak tama dahuluk ba sala teste hodi tuir teste prova kulturál.
Prova kulturál ne’e hahú kandidatu balun tarde, maibé komisaun tolera hodi admite sira tama ba iha sala teste hodi submete ba teste kultura.
Prova kulturál ne’e abertura husi Segundu Komandante Jerál PNTL Komisária Asistente Polísia Natercia akompaña husi Komisaun no juri ba rekrutamentu sira.
Komisáriu Komisaun Anti Korrupsaun Rui Pereira dos Santos inklui ekipa observadór no fiskalizador ba rekrutamentu vaga membru PNTL foun hanesan Fundasaun Mahein, PDHJ, Parlamentu Nasionál no Ministeriu Interiór.
Prezidente Komisaun no juri ba rekrutamentu vaga membru PNTL foun Komisáriu Asistente Polísia José Soares hatetete, Komisaun Rekrutamentu Membru PNTL foun ba tinan 2026 deside ona iha ohin loron 08 fulan -outobru 2026 fó ezame prova kulturál ba kandidatu sira husi Munisípiu Aileu.
“Ita boot sira ohin haree hahu husi istória Polísia Nasionál Timor-Leste ohin istória foun ba PNTL tanba ita-nia ezame liuhusi sistema ida ezame bazea ba komputadór.
Nia dehan, iha prosesu reverifiksaun dokumentu ba kandidatu sira mós komisaun no juri sira mós halo ho sistema komputadór.
Matéria ne’ebé mak fó ba kandidatu iha prova kulturál mak istória, matimatika, geografia, tetum, portugés ho Konstitusaun pergunta ne’e hamutukm-80.
Ema ne’ebé prepara matéria sira.ne’e husi Ministeriu Edukasaun, PNTL. Husi ne’e hakarak hatudu buat ne’ebé di’ak lori satisfasaun ba povu.
Rezultadu husi Funsaun Públika ne’e mak komisaun rekrutamentu imprime sei públika iha kada eskudra no Komandu Munisípiu sira no Komisaun sei fo kandidatu sira atu haree sira-nia naran durante loron lima nia laran.
Iha sorin seluk Prezidente Interinu Komisaun Funsaun Públika (CFP), Komisária Anita Tavares Ribeiro de Jesus agradese ba PNTL tanba bele tau konfiansa ba KFP.
Tanba sistema i ne’e laos foin mak utiliza, maibé utiliza kleur ona, maibé ida ne’e foin dahuluk ba PNTL uza iha nia rekrutamentu atu garante ba iha transparansia efisiente no efikasia ba iha prosesu sira ne’e.
“Ita iha komputadór, 200 ida ne’e ami iha ho ami-nia tekniku apropeiadu sistema ida ne’e ami utiliza tiha ona iha 2019. Ema sira iha ne’e ami garatidu prosesu ne’e ami halo ona antes ne’e ema 3.000 mas la’o di’ak ho transparante.”
Enkuantu Komisáriu KAK Rui Pereira dos Santos hatete, prezensa KAK nian atu apoiu ba prosesu tomak ne’ebé la’o hela liga ba rekrutamentu membru PNTL foun ne’ebé Governu hamutuk ho Komandu PNTL halo.
“Ohin ita boot sira haree ne’e nepotismu KKN ne’e la hetan ona, kuandu buat sira ne’e mosu entaun KAK halo nia servisu.”
Jornalista : Cesar Pires
Editór : Herminio Cardoso