Loluwari Média (Hera) – Xefe Estadu Maiór Jenerál Forsa Defeza Timor-Leste (F-FDTL), Tenente Jenerál Domingos Raul “Falur Rate Laek”, hatete, ohin Joventude nomos klubu 17 ne’ebé mai partisipa kopa Navál atu fo solidaridade ba komponente Navál ba situasaun ida ne’ebé akontese loron hirak liu ba.
“Ohin ita hotu mai iha ne’e tu’ir kopa Navál, ne’e signifika ita fo ita nia solidariedade ba ita nia komponente Navál tanba tristeza bo’ot ita nia Forsa Armada liliu komponente Navál hasoru, tanba ohin ita hotu nia prezensa ne’e hanesan jestu solidariedade ba ita nia aman no maun sira no ohin Kopa Navál abertura atu imi prepara joven ne’ebé hadomi bola no balu sai forsa atu nune’e ita bele kria paz no estabilidade iha Sosiedade nia le’et.” Dehan Xefe Estadu Maiór Jenerál Forsa Defeza Timor-Leste (F-FDTL), Tenente Jenerál Domingos Raul “Falur Rate Laek”, ba jornalista sira, iha kampu Futeból Hera, segunda (06/01).
Falur hatete, kopa Navál atu kria paz no estabilidade ba juventude sira. Tanba jogu ne’e iha manan no lakon tanba manan mos vitoria lakon mos ho vitoria tanba lakon atu aprende. Buat ida jogu tuir mai bele hetan tatiku ne’ebé diak hodi manan di’ak liu.
“Bemvindu ba klube 17 ne’ebé partisipa iha kopa Navál ida ne’e atu hatudu imi nia disiplina iha kampu uza imi nia tatiku no abilidade ne’ebé iha, importante liu mak ita fo saudasoes ba malu tenke jogu ho diak tanba bola ne’e ida manan ida lakon ita hakarak manan maibé tenke prontu simu mos ho lakon.”
Komandante Komponente Naval, Komodoro, Higino das Neves, dehan, kopa Navál la estabelese hanesan tinan kotuk liu ba tanba servisu barak.
“Ohin ita realiza fali kopa Navál ho prezensa Sua exelensia Xefe Estadu Maiór Jenerál F-FDTL sei motiva ami liliu Juventude sira tanba kopa Navál nia objetivu la’os atu manan ka lakon maibé kopa Navál atu halibur juventude iha Timor laran tomak atu mai partisipa iha kopa Navál, ida ne’e atu kuñese malu kria relasaun amizade entre pesoal ba malu no fahe mos sira nia esperiensia no abilidade ba malu hodi servisu hamutuk atu garantia estabilidade ba ita nia rai.”
Kopa Navál atu hari’i unidade entre juventude ho forsa atu bele kuñese malu liuhusi jogu ida ne’e atu bele halo relasaun ne’ebé forti hodi garantia paz no estabilidade iha Timor-Leste.
“Ha’u husu ba joven sira liliu klubu 17, ita bo’ot sira mai atu uza ita bo’ot sira nia talentu no abilidade ne’ebé imi iha atu utiliza iha kampu la’os atu tuku malu no rai odi vigansa ba malu iha kampu. Maibé presiza fahe imi nia esperiénsia no skill ne’ebé iha to’o jogu ne’e remata.”
Prezidente Komisaun organizadora Kopa Naval, kapitaun Tanente, Rosario Alves da Cruz, hatete, kada tinan sempre realiza kopa Navál ne’ebé preve iha orariu anual hodi komemora existensia komponente Navál.
“Kopa Navál sai ona simbolu relasionamentu entre Forsa Armada ho komunidade liliu hakbi’it talentu ba ita nia juventude sira atu kria paz iha komunidade nia le’et. Husu klubu 17 mai ho talentu no determinasaun atu kompete iha kopa Navál ho espiritu Desportiva no disiplina.
Jornalista : Chay Risky