Loluwari Média (Liquiça) – Asesór, Quintiliano Moniz Carvalho, hatete, prezidente republika (PR), José Ramos-Horta, oferese nesesidade bazika no ekipamentus ba familia vulneravel no komunidade sira moris natoon hamutuk uma ka’in 150 iha suku Dato, Letala no Darlete, postu administrativu Bazartete munisipiu Liquiça.
“Ita nia Prezidente Repúblika fo apoiu nesesidade bazika no mos ekipamentus ba ita nia komunidade sira iha suku tolu, ho ita nia komunidade moris naton no mos familia vulneravel hamutuk 150 ne’ebé kompostu husi suku tolu mak suku Dato, Letala no Darlete ne’ebé ho nia proposta mai husi autoridade lokal suku tolu.” Dehan Asesór, Quintiliano Moniz Carvalho, ba jornalista sira, iha suku Dato munisípiu Liquiça, sexta (01/08).
Nia hatete, tu’ir loloos Prezidente Repúblika (PR) mak mai fo apoiu nesesidade bazika no ekipamentus hirak ne’e ba komunidade sira ne’e, maibé tanba Prezidente Repúblika iha agenda importante iha rai liur entaun Asesór ho nia ekipa mak lori sasan sira ne’e mai entrega ba komunidade sira husi suku 3 ne’e.
“Ohin ita lori nesesidade bazika mak fos mina manu tolu no mos jaket, bazeia ba proposta ne’ebé ita nia autoridade lokal sira fo ba Prezidente Repúblika no nesesidade bazika ne’e orsamentu mai husi Palásiu Prezidensiál nian no jaket ne’e apoiu husi Prezidente Repúblika nia kolega husi “THE NIPPON FOUNDATION”.”
“Sasan nesesidade bazika ne’ebé sua exelensia PR apoiu ba familia vulneravel no mos ba familia kbi’it natoon sira labele haree ba sasan maibé domin husi PR ne’ebé oferese ba imi ida ne’e mak importante.
Xefe suku Dato, Oscar da Silva, hatete, komunidade husi suku tolu ne’e benefisiariu hamutuk familia 150 mak simu nesesidade bazika husi PR bazeia ba proposta ne’ebé Autoridade lokal sira husi suku 3 ne’e rekolla no entrega ba Prezidente Repúblika.
“Ami autoridade na’in 3 no mos xefe aldeia sira nia servisu hamutuk hodi buka situasaun kona-ba ita nia komunidade ne’ebé moris ho kbi’it natoon no mos familia vulneravel sira iha suku tolu, ne’e mak ohin sira hetan apoiu husi ita nia nai Prezidente Republika no ami sei buka tan ita nia komunidade sira ne’ebé seidauk hetan atu nune’e bele hetan apoiu husi Prezidente Repúblika.”
Autoridade lokal nu’udar liman ain povu nian laiha buat murak mean atu fo ba Prezidente Repúblika maibé sira reprezenta povu suku 3 fo nia agradesementu klean no obrigadu barak ba sua exelensia PR ne’ebé ho nia domin tomak hodi responde duni sira nia pedidu no apoiu nesesidade ba komunidade sira.
Reprezenta familia Vulneravel, Eugebio Correia, agradese ba prezidente Repúblika no mos ba Asesór ne’ebé ohin to’o duni iha sira nia suku hodi fahe apoiu nesesidade bazika ba komunidade 150.
“Ami nia agradesementu klean no obrigadu wa’in ba ita nia PR no mos ba asesór ho nia ekipa tomak ne’ebé ohin loron hakat to’o mai iha fatin ne’e hodi fahe nesesidade bazika ba ami. Ami agradese tebes ba ita nia Prezidente Repúblika nia domin no laran luak tebes mai ami, ami espera katak ita nia sua exelensia PR mos sei apoiu ba ami nia maluk ne’ebé oras ne’e seidauk hetan apoiu no presiza duni ema hotu nia apoiu.”
Jornalista : Chay Risky